کابل ټکی کام هاشمي عبدالله
وروستي راپورنه وايي چې د دې موټر بم برید موخه دولتي چارواکي وو.
برید د ملي امنیت ریاست یوه دفتر باندې شوی ده، او زیات تلفات یې اړولي دي.
له چاودنې سمدلاسه وروسته د وړې اسلحې غږونه هم اورېدل شوي دي
يوې امنيتي سرچينې ويلي دي چې دې موټر بم بريد درنه مرګ ژوبله اړولې ده
د کورنیو چارو وزارت ویاند صدیق صدیقي وايي “دا ځانمرګی بريد وو او له چاودیدونکو موادو څخه د یوه ډک موټر په وسیله شوې ده.”
صدیقي وایي، “یوشمیر وسله وال مخالفین لا هم په سیمه کې شتون لري، يوې ودانۍ ته ننوتلي او له افغان ځواکونو سره په جګړه بوخت دي.”
د دغې حملې د کره مرګ ژوبلې په اړه تراوسه معلومات نشته خو ويل کيژي چې سيمه دولتي ده، او کېداى شي قربانيان ټول دولتي مامورين وي
ولسمشر محمد اشرف غني دغه حمله په شدت سره غندلې.
طالبانو د حملې مسئولیت اخیستی، او ویلي یې دي چې د برید هدف د استخباراتو لسم ریاست و.
ذبیح الله مجاهد وايي چې بریدګرو یې لمړۍ موټر بم چاودنه کړې او ورپسې د ملي امنیت ودانۍ ته ننوتي دي چې لا هم جګړه کوي خو دولتي سرچینو یې په ا ړه څه ندي ویلي.
د عامې روغتیا وزارت ویاند اسمعیل کاووسي وايي چې تراوسه په لسګونه ټپیان روغتونونو ته راوړل شوي دي او یو زیات شمېر مړي هم په روغتونونو کې پراته دي.
یوې بلې سرچینې ویلي دي چې د ټپيانو شمېره له دوه سوو څـخه اوښتې ده او د وژل شویو کسانو شمېره اتیاوو ته رسیږي.
امنیتي ځواکونه وايي چې سیمې ته یې امنیتي ځواکونه استولي او شاوخوا ټولې لارې یې تړلې دي.
برید دومره پیاوړی و، چې د کابل ښار ختیځو او لویدیځو سیمو کې هم اوریدل شوی دی.
.
