ليکوال : م، نجم الرحمن (فضلي)
د شوال مياشتې شپږ روژې
پوښتنه : له رمضان المبارک وروسته د شوال سپږ روژې نيول کيږي، آيا هغه پيوسته نيول کيږي او که جلا جلا هم نيول کيږي؟.
ځواب : د شوال د شپږو روژو ډير فضيلت راغلى، حضرت رسول الله صلی الله عليه وسلم فرمايلي : چا چې د رمضان روژو له ساتلو وروسته د شوال شپږ روژې ونيولې نو دا د پوره کال د روژو له نيولو سره برابرې دي، مګر دا ضروري نه ده چې له اختر سمدستي وروسته په دويمه ورځ يې نيول شروع کړى شي، او دا هم ضروري نه ده چې پيوسته ونيول شي، جلا جلا يې هم نيولاى شي ([1]).
د رمضان المبارک روژې په کومو خلکو فرض دي
پوښتنه : د رمضان المبارک روژې په کومو خلکو فرض دي؟
ځواب : په هر مسلمان عاقل، بالغ، نر او ښځه فرض دي، د هغې له فرضيت څخه انکار کونکی کافر او پرته له کوم عذره پريښودونکی يې سخت ګنهګار او فاسق دی!
اګر چې په نابالغ باندې لمونځ او روژه فرض نه دي، ليکن د عادت جوړولو لپاره يې له بلوغ څخه دمخه د روژې نيولو او لمونځ کولو حکم شوی دی، په حديث شريف کې راځي کله چې هلک د اوو کلونو شي نو په لمانځه يې ودروئ او چې لس کلن شي نو د لمانځه نه کولو په صورت کې يې وهل هم پکار دي، همدا شان چې د روژې نيولو طاقت پکې وي نو چې څومره روژې نيولی شي هومره روژې دې ورباندې ونيول شي ([2]).
([1]) فتاوى رحيميه، ٧ : ٢٠٤، بحواله : درمختار مع شامي، ج : ٢، ص : ١٧١، مطلب في صوم الست من شوال، وصوم ست من شوال قيل الافضل وصلها وقيل تفريقها، نور الايضاح، ص : ١٤٥، کتاب الصوم، فصل اقسام الصوم.
