د خوست مركز كې د فوټبال دوه مياشتنۍ سيالۍ پاى ته ورسېدې
کابل ټکی کام ۱۳۹۵ غبرګولی ۱۱ عبدالهادي همت
د خوست په مرکز پنزایې کلي کې د فوټبال هغه سیالۍ چې شاوخوا دوه میاشتې وړاندې پیل شوې وې ،پرون ورځ پای ته ورسیدې.
دغه سیالۍ د پنزایې کلي د ځوانانو لخوا د سولې په نوم جوړې شوې وې چې هره ورځ به ورته سلګونه کسان نندارې ته راټولېدل.
دې سياليو پای لوبې ته د خوست د مرکز متون ګلزار اکا او اسمعیل خیلو او مندوزیو ولسوالۍ د حیدرخیلو لوبډلو لاره پیدا کړې وه، چې په اخره كې يې د حیدرخیلو لوبډلې د پينالټي په شاټونو سره ګلزار اکا لوبډلې ته ماتې ورکړه
د خوست د مرکز پنزایې کې د وحدت لوبډلې چې د دغو سیالیو د جوړولو مسوولیت یې پرغاړه درلود، رسنیو ته وویل: په دغو سیالیو کې ۴۰ لوبډلو برخه درلوده او د سیالیو له جوړولو یې هدف ځوانانو ته د سولې پیغام رسول وو. .
دغه سیالۍ په داسې مهال کې پای ته رسیږي، چې خوستيانو په دغه ولايت كې سږني كال ته د سپورټ د كال نوم وركړى .
خبر زیاتوي، چې په خوست کې ورزش او لوبو د بل هر وخت په پرتله وده او پرمختګ کړی دى، خو لوبغاړي اوس هم له زیاتو ستونزو سره لاس او ګریوان دي.
