سمنګان کې یوه پولیس خپل ۵ ملګري وژلي دي

کابل ټکی کام ۲۱غبرګولي/۱۳۹۵، احمدالله مهاجر
د سمنګان ولایت د دره صوف ولسوالۍ اړوند په اوزبک فریده سیمه کې یوه پولیس خپل ۵ تنه ملګري وژلي دي.
له سمنګان ولایت څخه خبري منابع وایي، چې نن ماسپښین د دغه ولایت د دره صوف ولسوالۍ اړوند په اوزبک فریده سیمه کې یوه پولیس د خپلې پوستې پر نورو پولیسو ډزې وکړې، او ۵ تنه پولیس یې ځای پر ځای ووژل.
خبر وايي، چې دغه پولیس له برید وروسته ځان تر طالبانو پورې رسولی دی.
طالبانو هم په خپله خبرپاڼه کې ویلي دي، چې دغه پولیس روغ رمټ تر دوی پورې رسېدلی دی، او د دغه پولیس تود هرکلی یې کړی دی.
طالبانو همدا راز ادعا کړې ده، چې دغه پولیس دوی ته ۱ میل پیکا ماشیندار، ۱ قبضه راکېټ، ۵ میله کلاشینکوفونه، ګڼې مرمۍ او نور ګڼ مهمات وروړي دي.