پر تورخم بیا د افغاني او پاکستاني ځواکونو ترمنځ جګړه شوې ده
کابل ټکی کام ۲۴ غبرګولي/۱۳۹۵، احمدالله مهاجر
تازه خبرونه وایي، چې نن شپه ۹:۳۰ بجې پر تورخم د افغاني او پاکستاني ځواکونو ترمنځ سخته جګړه ونښته، چې اوس هم په شدت سره دوام لري.
په ختیځه سیمه کې د سرحدي ځواکونو رئیس ښاغلي ارکان محمد ایوب حسین خېل وایي، چې لومړی د پاکستاني ځواکونو له خوا پر افغان سرحدي ځواکونو باندې برید وشو، چې وروسته د دواړو خواوو ترمنځ سخته جګړه ونښته.
ده وویل، چې جګړه اوس هم په شدت سره دوام لري.
حسین خېل وایي، چې د جګړې له امله تلفات هم اوښتي دي، خو کره شمېره يې نه ده په ګوته شوې.
ده خپلو هېوادوالو ته ډاډ ورکړ، چې د دوی ځواکونه به د سر په بدل کې خپله خاوره ساتي.
نا تأیید شوي راپورونه وایي، چې افغان ځواکونو له پاکستاني ځواکونو څخه یوه پوسته هم نیولې ده.
