چین کې شدیدو بارانونو، ۹۸ کسان وژلي، ۸۰۰ ټپیان کړي
کابل ټکی کام ۰۴چنګاښ/۱۳۹۵، هلال خاورې
د چین په یاچینګ ښار او شاوخوا سیمو کې د شدیدو بارانونو، بړبړکۍ او توپان له کبله لږ تر لږه ۹۸ کسان وژل شوي، او څه د پاسه ۸۰۰ کسان ټپیان دي.
د چین د بېړنیو حالاتو په مقابل کې د چټک غبرګون د ادارې او ملکي چارو وزارت ویلي دي، چې په جیانګسو ایالت کې د شدیدو بارانونو او توپانونو له کبله د ژوند چارې په ټولیزه توګه په ټپه درېدلي دي.
دغه وزارت ویلي دي، چې د چین ختیځ کې (د جیانګسو ایالت په یاچینګ ښار کې) او شاوخوا سیمو کې د شدیدو بارانونو او توپانونو له کبله سلګونو کسانو ته مرګ ژوبله اوښتې ده.
دغه وزارت د مړو شمېره ۹۸ کسان ښودلې ده، او ویلي یې دي، چې په ۸۰۰ ټپيانو کې د ۲۰۰ کسانو روغتیايي حالت نازک دی.
دغه وزارت ویلي دي، چې په سیمه کې ګڼ شمېر کسان بند پاتې دي، او د توپان سرعت په ساعت کې د ۱۰۰ او ۱۲۵ کیلومترو تر منځ دی.
د چین د هوا پېژندنې ادارې په جیانګسو ایالت کې د نورو قوي بړبړکو او د شدید توپان خبردارۍ ورکړی دی.
د دغه شدید توپان او بړبړکیو له کبله لسګونه کورونه وېجاړ شوي دي، چې زیات شمېر کسان د نړېدلیو کورونو لاندې پاتې دي.
په سیمه کې له یوې خوا څخه تخیلي چارې دوام لري، او له بلې خوا څخه خلکو ته لومړنۍ مرستې او همدا راز د ژغورنې چارې هم دوام لري.
دغه شدید توپان د ۱۹۶۶ میلادي کال راهیسې په سیمه کې تر ټولو قوي توپان او شدید باران په ګوته شوی دی.
