کابل ټکی کام ۱۳۹۵ چنګاښ ۸ زرغون خوږیاڼی
د پښتونخوا ملي عوامي گوند مشر محمود خان اڅکزې وایي: هيچاته به اجازه ورنکړي، چې په پاکستان کې افغانان وځوروي، که افغانان په نورو سيمو کې ځورول کيږي نو پښتونخوا سيمه لويه ده الته دی ورشي.
اڅکزی وايي: افغانستان سره زمونږ تاریخي رشتې دي، مونږ د افغانانو لپاره هیڅ شناختي کارت نه غواړو.
ښاغلي اڅکزي رسنیو ته په تازه خبرو کې وويل : دواړه غاړې دې له حوصلی کار واخلي او په خبرو دې د تورخم موضوع حل کړي.
ده وویل: که دواړه هيوادونه د خبرو له لارې د تورخم موضوع نشي حل کولای، د تورخم مسئله دې چين او امريکا ته پريږدي په دوو اونيو کې به يې حل کړي .
اڅکزي د خبرو پر مهال وویل: که پر افغانانو څوک زړه نه سوځوي له خدایه دې وویریږي.
اڅکزی دا خبرې په داسې مهال کې کوي، چې اوسمهال په پښتونخوا کې ۱۲۰۰ افغان مهاجرین د پولیسو لخوا نیول شوي او د یو ورک برخلیک په توګه په زندانونو کې پراته دي.
اوس چې دوه ورځې وروسته د جون په ۳۰مه په پاکستان کې د افغان مهاجرینو د پاتې کېدو رسمي وخت پوره کیږي، د خیبرپښتونخوا حکومت له مرکزي حکومت څخه غوښتي، چې په پاکستان کې د افغان مهاجرینو د پاتې کېدو موده نوره ونه غزوي او سملاسي دې د ثبت او ناثبت افغان مهاجرینو د ویستلو لړۍ پیل کړي.
بلخوا د مهاجرینو په اړه د ملګرو ملتونو عالي کمشنرۍ UNHCR بیا د پاکستان له حکومت څخه غوښتي، چې تر ۲۰۱۷ز کال پورې د افغان مهاجرینو وخت وغزوي.
