کابل ټکی کام ۱۳۹۵ زمری ۶ زرغون خوږیاڼی
د چیچنیا ولسمشر وايي، چې امریکا په افغانستان کې د ټولو وژنو او ترهګریو لامل ده.
د چیچنیا د هېواد رهبر رمضان قدیروف ویلي امریکا په افغانستان او نوره اسلامي نړۍ کې دمسلمانانو په وژنه لاس پورې کوي او دې وژنو ته یې بېلا بېل نومونه ورکړي دي.
قدیروف ویلي که امریکا وغواړي په افغانستان کې په دوو کلونو کې هر څه سمېدلی او سوله راتللی شي، خو امریکا غواړي چې په سیمه کې بې ثباتي تل پاتې او اوږده وي.
د هغه په وینا په افغانستان کې له څلورو لسیزو راهیسې جګړه روانه ده او ټوله نړۍ په دې لګیا ده، چې دې جګړې ته حل لاره پیدا کړي، خو د افغانستان د جګړې له منځه وړل د امریکا په لاس کې دي.
نوموړي زیاته کړې، چې د تېرو لسیزو جګړو لامل هم په افغانستان کې امریکا وه او اوس روانه جګړه په افغانستان کې او په ټولو اسلامي هېوادوونو کې د امریکا د ناوړه پلانونو یوه برخه ده.
هغه ویلي امریکا او ناټو په سیمه کې پوره ځواک لري او کولی شي له خپل قوت په استفادې په افغانستان کې وژنو او نا امنیو ته په ډيره لنډه موده کې د پای ټکی کېږدي، خو له روانې جګړې ښکاري چې دوی په خپلو ژمنو کې رښتیني نه دي. هغه په کابل کې پر وروستي ځانمرګي خفګان څرګند کړی او ویلي یې دي چې په ټولو اسلامي هېوادونو کې د امریکا شوم پلانونه غندي.
