د چمن- سپین بولدګ لاره د شپږمې ورځې لپاره هم تړلې ده
(کابل ټکی کام ۱۳۹۵ وږی ۲) زرغون خوږیاڼی
د کندهار او بلوچستان تر منځ د چمن ـ سپین بولدګ لاره نن شپږمه ورځ هم تړلې ده، ویل کیږي چې دواړو غاړه ته په سلګونه لارۍ، کانټینرې او نور سوداګریز موټرونه ولاړ دي.
د دروازې دبندیدو له سببه د سیمې دواړو غاړو سوداګرو ته په میلیونونو ډالره تاوان رسیدلی دی.
وړمه ورځ د دواړو غاړو چارواکو سره یوه ناسته وکړه خو بې له کومې تنیجې پای ته ورسیده.
د افغانستان په جنوب کې د بهرنیو چارو استازي شاه محمد مشال راډیو ته وویل، پاکستانیو چارواکو د دې لارې د بیرته پرانستلو لپاره داسې شرایط ورته وړاندې، چې د ده په وینا ، له ښه ګاونډیتوب سره سمون نه خوري.
شاه محمد وویل ، پاکستاني چارواکي غواړي چې د چمن – سپین بولدګ پر دروازه دې د رسمي پولې غوندې مراسم هره ورځ تر سره شي. په شرطونو کې دا هم راغلي چې افغان چارواکي دي د تل لپاره په خپله خاوره کې د پاکستان پر ضد د هر راز کړنو مخه ونیسي.
تر اوسه د پاکستان او فغانستان د لوړ پوړو چارواکو په دې اړه څه نه دي ویلي.
ویل کیږي چې په چمن پوله هره ورځ له ۱۰ زرو څخه تر ۱۵ زرو پورې خلک تګ راتګ کوي.
