کابل ټکی کام ۰۲وږي/۱۳۹۵، احمدالله مهاجر
په هلمند ولایت کې د طالبانو له لورې د پراخو ځپوونکو عملیاتو په جریان کې؛ د چارواکو ترمنځ د دغه ولایت د سقوط اندېښنې راولاړې شوي دي، چې بالاخره د افغان ځواکونو د حفاظت او ساتنې لپاره ۱۰۰ نور امریکایي عسکر دغه ولایت ته واستول شول.
دغه خبر تېره ورځ په افغانستان کې د امریکایي ځواکونو ویاند برید جنرال چارلز ورکړ.
طالبانو د دغو نویو امریکایي عسکرو پر راتګ سخت غبرګون ښودلی دی او دا یې د دوی لپاره ګټمن نه، بلکې لا زیانمن بللی دی.
طالبانو ویلي دي:
« زموږ باور دی چې امریکایان به په دې اقدام سره بې له دې چې دخپلو تلفاتو شمیر یوځل بیا ډير کړي او دخپلو عسکرو زګیروي او ساندې واوري؛ بله کومه لاسته راوړنه به ونلري. ان شاءالله».
طالبانو په هلمند کې د خپلو جنګیالیو پر پراخ حضور او فعالیت تأکید کړی دی، چې دوی هلته برلاسي دي او هر وخت چې وغواړي په هره سیمه کې پراخ او بري موندونکي عملیات ترسره کولی شي.
طالبانو ویلي دي، نوي راغلي امریکایي عسکر به د دوی او د ولسي خلکو «جهادي جذبې» نورې هم تاندې کړي او پر دوی به سخت ځپوونکي بریدونه ترسره کړي.
