(کابل ټکی کام ۱۳۹۵وږی ۶) الماس خدرخېل
د ترکيې رسنيو له قوله چې د دې هېواد ښځينه پوليسو ته د پړوني پر سر کولو اجازه ورکړل شوه او له دې وروسته د ياد هېواد ښځينه پوليسې کولی شي، چې د نظامي خولۍ لاندې پړونی واغوندي.
په ترکیه کې په ۲۰۱۳ کال کې د ولسمشر رجب طیب اردوغان په دولتي اداراتو کې د پړوني د په سر کولو اړوند قوي اصلاحات رامنخته کړل. ددې اصلاحاتو لمن لا پسې پراخه او ښځینه پولیسو ته د دندې پر مهال د پروني یا حجاب په سر کولو پر وړاندې موجود ټول خنډونه لرې کړل.
د ترکيې د کورنيو چارو وزارت په يوه خپره شوې اعلاميه کې په رسمي ډول ويلي، چې د ترکيې هېواد ښځينه پوليسې کولی شي، چې د رسمي يونيفورم د خولۍ لاندې د يونيفورم سره همرنګه پړونی يا حجاب په سر کړي.
دا لومړی ځل دی چې د ترکيې حکومت ښځينه پوليسو ته د رسمي يونيفورم سره د پړوني پر سر کولو اجازه ورکوي.
د يادونې وړ ده، چې په ځينواروپايي هېوادونو کې ښځينه پوليسې د دې اجازه لري چې د نظامي يونيفورم لاندې پړونی پر سر کړي، خو ځينې نور هېوادونه، لکه انګلستان او کاناډا کې ښځينه پوليسو ته د دندې پر مهال د پړوني د پر سر کولو اجازه نشته.
