خدرخېل
يوه نيمه مياشت وړاندې طالبانو وويل، چې د هلمند ولايت مرکز لښکرګاه او کندهار لويه لار يې د نهر سراج يکلنګ او نورو سيمو کې د افغان امنيتي ځواکونو پر مخ تړلې ده.
هغه وخت په سيمه کې د افغان ځانګړو ځواکونو قومندان سيد مراد ويلي و، چې طالبان په درنو وسلو، منظم لباس، د شپې لېدلو په ټيکنالوژۍ او په پرمختللیو وسلو سنبال دي. سيد مراد همدا راز ويلي و، چې د طالبانو ځانګړي ځواکونه د «سرې قطعې» په نوم یادیږي چې ياده لاره يې تړلې ده.
د ۱۳۹۵د زمري د مياشتې په ۲۳ تاريخ د هلمند د ترانسپورت رياست مشر عبدالغفور توخي رسنيو ته وويل، چې د هلمند کندهار لويه لار يې د ترافيکو پر مخ پرانيستې ده.
د زمري په ۲۳ تاريخ سيمييزو چارواکو هم خبرونه ورکړل، چې ياده لاره يې د ترافيکو پرمخ خلاصه کړې ده.
كه څه هم په بار بار د دې لارې د خلاصون خبره كېږي، خو د هلمند مرکز لښکرګاه سيمييز خبريالان وايي،چې اوس هم د کندهار او لښکرګاه تر منځ پر غځیدلې لاره مسافر وړونکو موټرو ته د تګ اجازه نه ده ورکول شوې.
د روان کال د زمري په ۱۸ افغان امنيتي ځواکونو د يادې لارې د خلاصون په موخه عمليات پيل کړل، چې د يادو عملياتو په اړه د څلورم سرحدي زون قومندان پاسوال سلطان محمود ويلي و، چې د يادې لارې د خلاصون په موخه يې په عملياتو کې طالبانو ته ډېره مرګ ژوبله وراړولې، هغه وويل چې په يادو عملياتو کې سرحدي پوليس، ملي اردو، ملي امنيت، او ملي پوليسو برخه اخيستې وه، نوموړي دعوه کړې وه، چې ياده لاره يې د ترافيکو پرمخ خلاصه کړې ده.
بل پلو طالبانو په يو تازه ويډيي راپور کې ويلي، چې ياده لاره يې تر دې دمه د امنيتي ځواکونو پرمخ تړلې هغوی وايي، چې لاره يې د اګست د مياشتې په ۴ نېټه وتړله او هلمند کې امنيتي ځواکونو ته د تلفاتو وراړولو ادعاء هم کوي دوی وايي، چې په هلمند کې د دوی وسلوال طالبان په تعرضي حالت کې دي او دښمن په فاعي حالت کی دی.
طالبانو ويلي، چې د بهرنيو ځواکونو په بيا ځلې رارسېدو سره سم افغان چارواکو يو ځل بيا شور جوړ کړو او خپلې موسمي لاپې او غرور يې رسنيو ته ښکاره کړ.
هغوی وايي، چې زمونږ ملګري په ښه مورال باندې جګړه کوي او هيڅ يوه سيمه يې هم دښمن ته نه ده پرېښې.
حکومتي لوړ رتبه افسرانو څو ځله د هلمند کندهار لويې لارې د خلاصولو ټټر وډباوه، مګر د طالبانو د کمينونو او جګړو له امله يې لا هم خپلې لاپې نه دي ترسره کړي.
ياده لاره، چې ځينو رسنيو د پل صرات نوم ورکړی او د نهرسراج په اړونده سيمه کې طالبانو تړلې ده، ډېر ځله حکومتي چارواکو د لارې د خلاصون اعلانونه وکړل، خو تر دې دمه يې لاره نه ده خلاصه کړې او په باربار يې عمليات له ماتې سره مخ شوي دي.
طالبانو په نوموړي راپور کې ويلي، چې د يادې لارې په جګړو کې يې د لسګونو موټرو د ويجاړولو تر څنګ د لښکرګاه امنيه قومندان اقانور اود ديشو ولسوالۍ امنيه قومندان جانان په ګډون يې ۳۰۰ امنيتي سرتيري وژلي دي.
ويل کېږي، چې افغان ځواکونو د يادې لارې د بنديدو له پيل نه تر دې دمه په لسګونه بريدونه د دې لارې د خلاصولو په موخه کړي خو ټول بريدونه يې طالب وسلوالو د شکست سره مخ کړي دي.
طالبان زياتوي، چې دولتي ځواکونو د بهرنيو بادارانو په شمول يې د يکلنګ، شيندک مانده، ستارخان کنډک او يو شمېر نورو سيمو کې د لښکرګاه او کندهار له لوري تعروضي بريدونه او بمبارۍ وکړې، چې په يادو تعروضونو کې يې ډېر مالي او ځاني تلفات وليدل. همداراز دکندهار او هلمند لار يې اوس هم پر مخ بنده ده او هيڅ لوري ته يې پرمختګ نه دی کړی.
