(کابل ټکی کام ۱۳۹۵ وږی ۸) زرغون خوږیاڼی
طالبانو ویلي، چې نن سهار وختي امریکایي او داخلي عسکر د ننګرهار ولایت په چپرهار ولسوالۍ کې د چاپې لپاره له هیلیکوپترو ښکته شوله، چې له کلک برید سره مخامخ شول.
طالبانو په خپره شوې خبر پاڼه کې ویلي، چې نن سهار وختي امریکايي عسکرو د خپلو کورنیو داخلي عسکرو په ملګرتیا د ننګرهار ولایت چپرهار ولسوالۍ اړوند سپين جومات سیمه کې غوښتل د مجاهدینو په یوه سنګر باندې چاپه ووهي، چې له کلک غبرګون او برید سره مخ شول.
طالبان زیاتوي ، چې په سیمه کې امریکايي او داخلي عسکر له پراخه بریدونه سره مخ شول، چې له امله يې ۱۳ تنه بهرني او کورني سپيشل فورس عسکر ووژل شول او ۷ تنه نور ټپيان شول.
دوی وايي، چې امریکایانو دخپلو مړو او ټپيانو د انتقال لپاره ۳ ځله سيمې ته امبولانس هلیکوپترې را واستولې.
طالبانو په یاده چاپه کې د خپلو ۵ ملګرو د مړینې او ۳ نورو د ټپي کیدو خبر هم ورکوي.
په خبر پاڼه کې ویل شوي، چې امریکايي ځواکونو د وارخطايې او د خپلومړو د غچ اخیستنې په موخه د عامو خلکو په کورونو بمباري وکړه، چې په کې ملکي وګړي د ښځو او ماشومانو په شمول شهیدان او ټپيان شول.
تر دا مهاله په افغانستان کې میشتو خارجي قواو په دې اړه څه نه دي ویلي.
