بلجيم: بروکسل کې بمي بريد شوی
(کابل ټکی کام ۱۳۹۵وږی ۸) الماس خدرخېل
د بلجيم پلازمېنې بروکسل په يو انستيتيوت کې تېره شپه بمي بريد شوی، ويل کېږي چې د کريمنولوژۍ انستيتيوت ته يو شمېر کسان په موټرو کې ورغلي او په ياد انسټيټيوټ يې بمي بريد کړی.
د چاودنې له امله ودانۍ زيانمنه شوې خو ځاني زيان نه لري، رسنيو ويلي چې په ودانۍ کې د شپې ناخوته څوک نه و، ځکه يې ځاني تلفات نه لرل.
نوموړی انسټيټيوټ د بلجيم هېواد د عليې وزارت اړوند دی، پوليسو پېښه تر څېړنې لاندې نيولې ده.
د يادونې ده، چې د روان کال مارچ په ۲۲ مه نېټه د نوموړي هېواد په هوايي ډګر او ميترو سټيشن هم بريدونه وشول، چې پکې ۳۲ تنه ووژل شول.
