جنرال نیکولسن: په تیره میاشت کې له۹۰۰ نه زیات افغان سرتیري وژل شوي
(کابل ټکی کام ۱۳۹۵ وږی ۱۰) زرغون خوږیاڼی
په افغانستان کې د ناټو عمومي قوماندان جنرال جان نیکولسن نن یوې غونډې کې وویل، چې د جولای په میاشت کې د افغانستان د اردو او پولیسو له ۹۰۰ څخه زیات منسوبین د طالبانو سره په جگړه کې وژل شوي دي.
د ناټو ځواکونو یاد قومندان زیاته کړه، چې په دې شمیر سره تیره میاشت هره ورځ نږدې ۳۰ عسکر په جګړو کې وژل شوي دي.
نن د چهارشنبې په ورځ د کورنیو چارو په وزارت کې ددغه وزارت او د اروپايي ټولنې لخوا د پولیسو د راتلونکي په باب دوه ورځینی کنفرانس کې نیکولسن وویل، چې د افغان پولیسو په لیکو کې سالمه رهبري شتون نه لري.
جنرال نیکولسن وویل ” د نننۍ غونډې په سر کې زه هیله لرم چې د ډيرو هغو زړورو پولیسو او عسکرو یادونه وشي چې د دغه هیواد څخه د ملاتړ لپاره یې خپل ځانونه قربان کړي دي، یوازې تیره شپه د هغوی زیات شمیر وژل شوي دي. په حقیقت کې د جولای په میاشت تر ۹۰۰ زیات افغان عسکر او پولیس وژل شوي وو، چې شمیر یې د یوې لیوا منسوبینو ته نږدې دی. لازمه ده چې مونږ د هغوی قربانۍ له پامه ونه غورځوو “.
د افغانستان د کورنیو چارو وزارت بیا وویل، چې د تېر کال په پرتله سږ کال د پولیسو په مرګ ژوبله کې ۱۰ سلنه کم والی راغلی، په داسې حال کې چې د پولیسو په عملیاتو کې ۳۰ سلنه زیاتوالی راغلی دی.
د افغانستان د دفاع وزارت ویلي دي چې افغان سرتیري په ١٥ ولایتونو کې د وسله والو مخالفینو پر وړاندې په جگړه بوخت دي.
په یاد کنفرانس کې اجرائيه رئيس عبدالله هم خبرې وکړې، ده وویل، چې دا د تیارې او رڼا جګړه ده: ((متاسفانه له داسې دښمن سره مخامخ یو چې زمونږ په سوله باور نه لري، په خبرو مو باور نه لري، د مذاکراتو له لارې د قضیې حل ته باور نه لري، که همدا دریځ حاکم وي او تر هغه چې دښمن مو ملاتړی ولري، متاسفانه په افغانستان کې به ناامني دوام ولري)).
