ولسمشر غني وايي، د سولې په لار کې هېڅ ډول خنډ ورته د منلو نه دی
کابل ټکی کام ۲۲وږي/۱۳۹۵، احمدالله مهاجر
نن افغان ولسمشر اشرف غني په ارګ کې د لوی اختر لمونځ اداء کړ او له لمانځه وروسته یې د یوې وینا په ترڅ کې وویل، چې د سولې په لار کې ورته هېڅ ډول خنډ د منلو وړ نه دی.
ولسمشر غني له سولې عالي شورا او د حزب اسلامي له مرکچیانو څخه مننه وکړه، چې د سولې په لار کې یې د پام وړ پرمختګ کړی دی.
غني هیله څرګنده کړه، چې د حکمتیار سره به د سولې هوکړه ژر نهایي شي.
«د افغانستان د ولسمشر په توګه د سولې پر وړاندې هېڅ داسې خنډ چې دلیل و نه لري نه شم منلی.».
تمه کېده، چې د حکمتیار او دولت ترمنځ د سولې تړون به د اختر څخه مخکې لاسلیک شي، خو د سولې عالي شورا وايي، چې د اختر د رخصتیو په شمول د یو شمېر تخنیکي ستونزو له کبله د هوکړه لیک لاسلیک ځنډېدلی دی.
د یادولو ده، څه موده وړاندې د حکمتیار له سولې سره یو شمېر حکومتي چارواکي خلاف وو، خو ویل کیږي، چې اوس هغه ستونزې له منځه تللي دي.
