(کابل ټکی کام ۱۳۹۵تله ۶) الماس خدرخېل
د ارزګان ولايتي شورا غړي وايي، چې د ارزګان مرکز ترينکوټ څو سوه مترۍ ته وسلوال مخالفين رانږدې شوي او درنه جګړه يې پيل کړې ده.
په ولسي جرګه کې د اروزګان استازي عبيدالله بارکزي ازادۍ راډيو ته وويل: چې د ولايت ډېری ولسوالۍ له سقوط سره مخ دي او امنيتي وضعه کې هېڅ ښه والی نه دی راغلی. څو ورځې وړاندې هم امنيتي ځواکونه اړ شول، چې د جګړو له کبله د ګيزاب ولسوالۍ مرکز خوشې کړي او څلور کيلو متره لرې يوې قرارګاه ته په شا شي.
د اروزګان استازي زیاتوي، دا مهال جګړه د مرکز په څنډو کې دوام لري او د دوی له بیا بیا خبرداریو سره سره حکومت تر اوسه پدې برخه کې جدي اقدام ندی کړی.
قومي مشران وایې: وسله والو مخالفينو له خلکو غوښتې چې د درنو وسلو له بریدونو د خونديتوب لپاره باید خپلې مینې پریږدي او د جګړې له ډګره لرې پاتې شي.
د اروزګان د استازو په وینا، د اروزګان ـ کندهار او یو شمېر ولسوالیو لارې لا هم تړلې دي او د جګړې له امله بې ځایه شوي خلک په بد وضعیت کې ژوند کوي.
بل پلو طالب ويندوی په يو تازه رالېږلې خبرپاڼه کې ويلي، چې د دوی پلويانو تېره ورځ د ترينکوټ په چولنګر سيمه کې د افغان امنيتي ځواکونو سره درنه جګړه کړې، چې په پايله کې يې دولتي سرتيرو ته مرګ ژوبله وراړولې ده.
په خبرپاڼه کې ويل شوي، چې د جګړې پر مهال ۲ ټانګونه ويجاړ شوي او پکې سپاره عسکر يې له منځه وړي.
همداراز په خبرپاڼه راغلي، چې حکومتي الوتکو په عسکرو بمباري کړې چې مرګ ژوبله ورته اوښتې ده.
