کندز: د اردو دوه سرتیرو خپل ۱۲ عسکر وژلي
(کابل ټکی کام تله ۶) زرغون خوږیاڼی
په کندز ولایت کې د ملي اردو دوه تنه سرتیرو خپل ۱۲ سر تیري وژلي او د خپلو وسلو سره طالبانو ته تښتیدلي دي.
ویل کیږي چې د کندوز ولایت په زاخیل خمدا سیمه کې د اردو دوه تنه سرتېرو په خپله پوسته کې د شپې ناوخته په خپلو ملګرو برید کړی او د ملي اردو ۱۲ عسکرو له وژلو وروسته د خپلو وسلو سره یو ځای د طالبانو لیکو ته تښتیدلي دي.
د کندوز ولایت یو امنیتي چارواکي شیرغزیز کامه وال رسنیو ته پیښه تائید کړې ده او ویلي يې دي چې دا دوه تنه د ملي اردو سرتیري وو چې یو یې د تخار او بل یې د جوزجان اوسیدونکي دي.
شیر غزیز کامه وال وویل، چې نوموړو دوو تنو سرتیرو د خپلو همسنګرانو سره ستر خیانت کړی او په ډیر ناځوانمردانه ډول سره يي ۱۲ سرتیری وژلي دي.
په کندوز کې د پلې لوا چارواکو ویلي دي، چې سیمې ته یې د تحقیقاتو لپاره یو هیئت استولی دی تر څو د پيښې په اړه څیړنه وکړي.
دوی وايي له څیړنو وروسته به د پيښې سبب په ډاګه شي.
طالبانو تر اوسه پورې په دې اړه رسنیو ته څه نه دي ویلي.
