لیکنه: د خړې حجرې خړ طالب
یوه ډېره مهمه نکته، چې باید دا ملگري ټول ورته متوجه شو، هغه دا ده چې موضوع ورکه نه کړو، د ګلبدین په هکله بعضې ملگري داسې انګیري او له لیکنو څخه یې داسې اټکل کیږي چې ګواکي ګلبدین منحرف شو او د جهاد او افغانیت مسیر یې گواکي پرېښود.
د ګلبدین په حق کې دا د حقیقت خلاف یو ډېر ناسم تأثر دی، ګلبدین له اصله همداسې شی وو، د ده هر څه ډنډوره او ډرامه وه.
که مونږ د ګلبدین تېر تاریخ ته ورشو، هغه را په زړه کړو، د روسانو د جهاد څخه نیولې بیا تر امریکایي اشغال پورې د ده هر څه سر چپه وو، هر وخت د ده له خوا اسلامي جهاد ته مشکلات پېښ شوي، د روسانو په مقابل کې د افغانانو د جهاد پر مهال د مجاهدینو ترمنځ د برخوردونو ستر عامل او نوښتګر، حزب او ګلبدین وو آن تر دې پورې زما په یاد دي، چېرې به چې د مجاهدینو تر منځ برخورد پېښ وو، نو خلکو به ویل دا بله کومه ډله ده؟
دا ځکه چې د برخورد یو طرف او جهت خو به خامخا ګلبدین وو، نو خلکو به فقط دغه بل جهت معلومول غوښتل.
د جهاد په دوران کې د مجاهدینو ترور د دوی د تنظیم اهم کار وو.
د علماو سره دښمني یې تر خلقیانو او پرچمیانو ډېره پخه وه.
په کابل کې چې د نجیب نظام چپه شو او د مجاهدینو نظام راغی، ګلبدین د مجاهدینو د نظام صدراعظم وو، یواځې یو کس تر ده پورته وو، خو د جاه او څوکۍ د عشق لېوني کله دغه نظام کار ته پرېښود، په کابل یې د راکټونو باران شروع کړ، زرګونه مظلوم افغانان یې شهیدان کړل، د خپل قدرت په خاطر یې ولس له بلا ناخوالو سره مخ کړ، د ګلبدین دغه کړه وړه ولې له خلکو هېر دي؟
بیا چې د اخوانیانو ترمنځ د قدرت په سر جنگونو ولس ته د شر او فساد پیغام راووړ او طالبان د دې ناورین څخه د مظلومو کړېدلو افغانانو د نجات په خاطر د ولس له منځه راپورته شول، اول چا د دې سپیڅلي لښکر مقابله وکړه؟ خو همدا گلبدین وو، چې د زرداد، چمن، قلم او پنسل په بدرګه تر خپل وسه ورسره وجنګېدو.
د زرداد، چمن، قلم او پنسل محلي مظالم له چا هېر دي؟ همدې ګلبدین د څوکۍ او قدرت په هوس غوښتل ټول افغانان د زرداد، چمن، قلم او پنسل له ظلمونو برخورداره کړي او ګلبدین څوکۍ ته ورسیږي، بیا چې کله پوه شو چې په یوازې ځان کار نه کیږي، نو د شوری نظار، دوستم، خلق، پرچم، او اخوانیانو څخه د ګډو اچارو بالټۍ ته د ګلبدیني سرکې بوتل د اچارو د خوندورتوب په هدف ورتوی نه شو؟ چې په نتیجه کې ټول طالب ځواک ته الله جل جلاله مات کړل او تر سالنگ واوښتل، بیا همدغه ګډوډ اچارېزم د طالب او اسلامي نظام مقابلې ته امریکه راونه ننگوله؟
د گلبدین دا کړه وړه ولې له خلکو هېرشول؟
د یو څو هغو پوښتنو هغه جوابات چې حالاتو، پېښو او تاریخ په خپله ورکړی، ستاسو د ذهن د تنویر لپاره راوړم.
د طالبانو د تحریک مقابله په ابتداء کې ګلبدین، مسعود، رباني، سیاف ونه کړه؟
ګلبدین د طالبانو د اسلامي داعیې، افغان او اسلام شموله صلح آمېزه تحریک خلاف په کابل کې د رباني له ادارې سره یو ځای نه شو؟
همدغه اچارېزم چې ګلبدین پکې یو مهم عنصر وو، د طالبانو خلاف امریکه راونه ننگوله؟
بیا چې کله امریکا افغانستان اشغال کړ، اسلامي نظام یې له منځه یووړو، په دې کار کې اچارېزم ورسره برخه وال نه وو؟
د یو هدف لپاره چې د طالبانو له منځه وړل، د اسلامي نظام چپه کېدل وو، اچارېزم او امریکه نه شول سره یو ځای؟ دوی ټولو په ګډه یو کار په مخ نه بوو؟
بیا چې کله امریکا یي نظام راغی، زه دا ټول ملت ته قسم ورکوم، دعوت ورکوم، را دې شي، سره کيني دې، د هر ولایت سپین ږیري، مجاهدین، قومي مشران، د عقل خاوندان او خبره ګان دې په مجلس کې سره کیني، د ثلاثه طلاق درې ډبرې به ټول واچوو، چې د هر ولایت حزبیان د امریکایي نظام مهم او کدري غړي نه وو؟
کوم نر به داسې ووایي، چې ستا دا خبره دروغ او په حسد بناء ده؟
د طالبانو نظام چا چپه کړ؟
د همدغه اچارېزم په غوښتنه د امریکا له خوا اسلامي نظام چپه نه شو؟ که داسې نه وي، راته ووایاست چې ته خلاف وایې.
او که څوک دا وایي: دا هغه حزبیان وو، چې د ګلبدین څخه یې لاره بېله کړې وه، د دې ځواب تر پرونه بل وو، خو پرون دغه جواب تغیر وخوړ، ګلبدین دې خدای نه خواروي، زه یې له دی ځوابه خلاص کړم.
پرون چې په خپله ګلبدین په ډېر جرأت او په ډېره سپین سترگی اسلام او ولس ته شاه کړه او خپل اصل ته یې رجوع وکړه، له خپلو بې لارو او بیل لارو سره یوځای شو نو دا اوس پیوستون شو که بېلتون؟
دغه یوې مهمي نکتې ته متوجه شئ!!!!
چې:
د گلبدین دغه کار انحراف نه، بلکې په خپل اصل اعتراف دی، ده په خپلو کړو وړو په ډاګه کړه چې زه دغه شی وم، دا مې اصل، دا مې هدف، دا مې تګلاره او طریقۀ کار دی، که پرون زما په ډنډورو او پوچو تبلیغاتو بعضې ساده مسلمانان، یا ناپوه او د کم بصیرت خاوندان غلط شوي وو، نن دې هغوی پوه شي، هغوی اصلاً زما په منافقانه سیاست او درواغو دوکه شوي، زه د قدرت وږی تږی، د قدرت مجاهد د قدرت مهاجر او د قدرت لپاره پر
ون سپین سپیڅلی مسلمان وم، خو نن د قدرت لپاره تورمخی، شرمنده، صلیب او کافر ته تسلیم شوی حکومت یار یم.
خپل اصل ته رجوع کوم.
او په خپله اصلي څهره اعتراف کوم.
له دا لیکوالانو ملگرو زما ګیله همدا وه، چې اوس په خپله گلبدین تاسو ورباندې پوه کړي او په خپله یې د خپل حال په ژبه ستاسو د قال د ژبې تکذیب وکړ، زه یې له ځواب او له گیلې خلاص کړم. مننه
