فارياب: دوستم مليشو دولت اباد کې کورونه سوزولي- ۴۰ ښځې او ماشومان ټپيان
(کابل ټکی کام ۱۳۹۵تله ۲۹) الماس خدرخېل
په داسې حال کې چې دوستم د فارياب ولايت په دولت اباد ولسوالۍ کې عمليات پیل کړي د يادې ولسوالۍ اوسېدونکي وايي، چې دوستم ته منسوبو مليشو له ۵۰ زيات کورونه او دوکانونه سوزولي دي.
د سيمې اوسېدونکو رسنيو ته ويلي، چې د دوستم اړوند مليشو د خلکو په زورونه لاس پورې کړی او د خلکو شتمنۍ يې لوټ کړي دي.
د سيمې يو تن اوسېدونکی نصرالله وايي، چې د شيش پور په کلي کې د دوستم اړوندو مليشو تر ۴۰ پورې ښځې او ماشومان ټپیان کړي، هغه زياته کړه هرڅوک چې د دوی مخې ته ورشي وهل ټکول ورکوي.
د فارياب ولايت مدني فعالان بيا وايي، چې د ولسمشر مرستيال دوستم په دغه ولايت کې له پښتنو سره قومي برخورد کوي او د طالبانو په پلمه له عامو خلکو سره زور زياتی کوي.
هغه وويل، چې جنرال دوستم د دې په خاطر عمليات نه دي پیل کړي، چې له وسلوالو سره جګړه وکړي، هغه وايي دا فقط يو قومي برخورد دی او موخه يې په سيمه کې د پښتنو زورول دي.
د دولت اباد ولسوالۍ اوسېدونکو له دولت نه غوښتي چې له دوی سره دې د روان زور زياتي نه مخ نيوی وشي.
