پاکستان: د راحیل شریف د تقاعد له امله، دده پلوي کس ځان وژنه کړې
(کابل ټکی کام ۱۳۹۵ لیندۍ ۱۱) زرغون خوږیاڼی
د پاکستان د پوځ مشر راحیل شریف د تقاعد له امله، د نومړي یوه طرفدار ځان وژنه کړې.
د پاکساتي مطبوعاتو په وینا، د کراچۍ ښار یوه اوسیدونکي لطف امین شبلي د پاکستاني پوځ پخواني مشر راحیل شریف د کاري مودې د اوږدولو غوښتنه کړې وه، شبلي د کراچۍ پریس کلب مخې ته په خپله وینا کې ګواښ کړی و که راحیل شریف له دندې لرې شي نو دی به ځان وژنه وکړي.
په راحیل شریف مئین لطف شبلي وروسته له هغه د ډودۍ نه خوړلو اعتصاب وکړ، چې راحیل شریف تقاعد او په کور کښیناست، شبلي ۲ ورځې وړاندې په کراچۍ کې د جناح روغتون ته لیږدول شوی و، چې تېره شپه یې په روغتون کې ساه ورکړه.
بلخوا د شبلي زوی رسنیو ته ویلي، چې پلار یې د راحیل شریف تقاعد کیدل ونه زغمل او ځان وژنه یې وکړه.
پاکستاني رسنیو ویلي، چې شبلي ۶۴ کاله عمر درلود او په کراچۍ ښار کې یې د کاریګرو د یوې ټولنې مشري په غاړه لرله.
لطف شبلي راحیل شریف د ((خلاصون پرښته)) بلله؛ خو بلخوا راحیل شریف تر اوسه په دې اړه څه نه دي ویلي.
