ولسي جرګه: حکومت دې د سلب اعتماد وزيرانو پر ځای نوي کانديدان معرفي کړي
(کابل ټکی کام ۱۳۹۵ليندۍ ۱۷) الماس خدرخېل
د افغانستان د ولسي جرګې غړو له ګډ حکومت نه غوښتي، ترڅو د سلب اعتماد شويو وزيرانو پر ځای نوي کانديدان جرګې ته ورمعرفي کړي.
د ولسي جرګې رئيس عبدالروف ابراهيمي ولسي جرګې ته د وينا پر مهال وويل، چې جرګه د ګډ حکومت مقابله نه کوي بلکې همکاري يې کوي.
دا په داسې حال کې ده، چې ولسي جرګې شاوخوا يوه مياشت مخکې ١٦ وزيران استيضاح کړل، چې درې د جرګې غونډې ته حاضر شول، خو نورو ته يې په غياب کې صندوقونه کېښول او په پايله کې يې له هغو ٧ تنو وزيزانو د باور رايه واخيسته، چې له ۷۰ فيصدو څخه يې کمه پراختيايي بوديجه مصرف کړې وه.
بايد وويل شي، چې ولسمشر اشرف غني د وزيرانو موضوع د څېړنې لپاره سترې محکمې ته لېږلې خو تر دې دمه محکمې لا کومه پرېکړه نه ده کړې.
