په ترکیه کې یو ورځینی ملي ماتم اعلان شو
(کابل ټکی کام ۱۳۹۵ لیندۍ ۲۱) زرغون خوږیاڼی
تيره ورځ د ترکیې په استانبول ښار کې یو لړ بمي چاودنو نږدې ۲۰۰ کسانو ته مرګ ژوبله واړوله، چې د یادو کسانو د درناوي په پار په ترکیه کې یو ورځینی ملي ماتم اعلان شو.
د ترکیې (trt Pashto) لیکلي، «تېره شپه په استانبول کې د ترهګري بریدونو په پایله کې د قربانیانو روح ته د درناوي به موخه په ټول هېواد او بهرنیو سیاسي نماینده ګيو کې د یوې ورځې لپاره ملي ماتم اعلان شو».
د ترکیې لومړي وزیر بن علي یلدرم ویلي، چې د وژول شویو کسانو د درناوي په خاطر به د ترکیې بیرغ د یوې ورځې لپاره نیم ځوړندی وي.
د وروستیو معلوماتو له مخې ویل شوي، چې په دوو جلا جلا چاودونو کې نږدې ۳۸ کسان ووژل شول چې ۳۰ یې پولیس ول او د ټپیانو شمیره ۱۶۶ تنو ته رسیدلې، چې د ځینو یې روغتیايي حالت نازک ښودل شوی دی.
ترکیه دا بریدونه د پی کا کا په سازمان پورې تړي.
