(کابل ټکی کام ۱۳۹۵ لیندۍ ۲۲) زرغون خوږیاڼی
امریکايي رسنیو ویلي چې روان ۲۰۱۶ز کال کې امریکايي ځواکونو په افغانستان کې ۳۵۰ عملیات ترسره کړي؛ خو ولې بیا هم د دې هیواد راتلونکی نامعلومه دی.
اسوشیټيډ پریس په وینا، په افغانستان جګړه په ۲۰۱۶ کې هم پراخه او پيچلې وه، خو د امریکا منتخب ولسمشر ډونالډ ټرمپ یې په اړه هیڅ فکر نه کوي.
د سرچینې په وینا، په ۲۰۱۶ز کال کې امریکايي ځواکونو په افغانستان کې د طالبانو او داعش پر وړاندې ۳۵۰ ځانګړي عملیات ترسره کړې، چې شپنۍ چاپې هم پکې شاملې دي.
د اسوشیټيډ پریس په وینا، امریکايي ځواکونه په افغانستان کې دوه ماموریتونه مخته وړي، چې یو یې د غوڅ ملاتړ ماموریت دی، چې په دغه ماموریت کې امریکايي ځواکونه یوازې د افغان پوځيانو په روزنه او تجهیز کې برخه اخلي، او په دویم ماموریت کې «د ازادۍ ګارد» په نامه د ناټو غړي او د غوڅ ملاتړ هیوادونو پوځیان د طالبانو، داعش او القاعده ډلو پر وړاندې وسله وال عملیات کوي.
دوی وايي، ددې سربیره چې امریکایي ځواکونو په ۲۰۱۴ ز کال کې جګړه ییز ماموریت ته د پای ټکی ورکړ، خو لاهم په دغه هیواد کې شپنۍ چاپې او ځانګړي عملیات ترسره کوي.
امریکايي رسنۍ وايي، د افغانستان د جګړې شپاړسم کال هم پوره شو، خو لا هم دا اوږده جګړه روانه ده او پایلې یې نه دي معلومې.
بل پلو «فردریک کاګان» د امریکن اینټر پرایزر بنسټ د جدي ګواښونو د پروژې مسوول وايي، سره ددې چې امریکا د افغان پوځيانو روزنه وکړه او په وسلو یې سمبال کړل، خو امنیت لا نور هم خراب شوی دی، چې امنیت نه وي هیڅ شی هم اهمیت نه لري.
