کابل ټکی کام (شنبه، ۱۲ غویی، ۱۴۰۵ل)
د روسیې د بهرنیو چارو وزارت ویلي، امریکا، بریتانیا او فرانسه د اټومي وسلو د نه خپرېدو اصول تر پښو لاندې کوي او غیر اټومي هېوادونه په داسې پلانونو کې شاملوي چې د نړیوال ثبات لپاره ګواښ بلل کېږي.
د وزارت په وینا، د ناټو د دفاعي اتحاد تعریف “یوه سیاسي افسانه” ده چې له کلونو مخکې بېاعتباره شوې ده.
روسيې ويلي، د بریتانیا او فرانسې د اټومي پروګرام دوام ښيي چې دغه هېوادونه د وسلو د محدودولو له تړونونو د تېښتې هڅه کوي.
همداراز ناټو د روسیې پولو ته نږدې پراختیا “دوامداره جیوپولیتیکي برید” بلل شوی چې د مسکو د ملي امنیت پر ضد دی.
په بیان کې ویل شوي، لوېدیځ د ملګرو ملتونو د امنیت شورا د غړو هېوادونو ترمنځ د اړیکو د خرابېدو مسوول دی او زیاتره اروپایي پلازمېنې لا هم د دښمنۍ سیاست پر مخ وړي.
روسیه ادعا کوي چې لوېدیځ د اوکراین له وضعیت څخه د روسیې د کمزوري کولو لپاره د وسیلې په توګه کار اخلي.
