کابل ټکی کام (شنبه، ۱۲ غویی، ۱۴۰۵ل)
د مهاجرینو ستونزو ته د رسېدنې عالي کمېسیون دارالانشاء وايي چې د جمعې په ورځ د هېواد له بېلابېلو لارو څخه ټولټال ۱۰۴۲ کورنۍ او ۵۵۱۳ تنه افغان کډوال په اجباري توګه هېواد ته راستانه شوي دي.
راپور زیاتوي یوازې د تورخم له لارې ۹۱۵ کورنۍ، له سپین بولدک، نیمروز، اسلام کلا او بهرامچې څخه هم سلګونه نورې کورنۍ هېواد ته داخلې شوې دي.
د راپور له مخې، له دغو کورنیو څخه ۶۸۵ کورنۍ بېلابېلو ولایتونو ته په خوندي ډول لېږدول شوې او ورته نغدي مرستې هم ورکړل شوې دي. همدارنګه له ۹۵۰ څخه زیاتو کورنیو سره مالي مرستې شوې، زرګونه کسان د ټرانسپورټ له لارې انتقال شوي او د خوراک، روغتیا او مخابراتو په برخه کې هم خدمات وړاندې شوي دي.
راستنو شویو ته سیمکارتونه، ډوډۍ او روغتیايي خدمات هم برابر شوي او عامه پوهاوی ورکړل شوی دی.
