کابل ټکی کام (شنبه، ۱۲ غویی، ۱۴۰۵ل)
د ترکیې ولسمشر “رجب طیب اردغان” په خپلو تازه څرګندونو کې ویلي، چې افریقایي هېوادونو کې روانې شخړې د لودیځ د جنګ غوښتونکي سیاست پایله ده.
نوموړي لودیځ هېوادونه په ځانګړې توګه امریکا او فرانسه تورن کړي، چې په سوډان، صومالیا، مالي او د نورو افریقایي هېوادونو د کانونو غلا په موخه هڅه کوي، چې یاد هېوادونه بې امنه کړي او خپلو ناوړه موخو ته ورسیږي.
نوموړي ټینګار کړی، چې هېواد به یې اجازه ورنکړي چې د افریقایي هېوادونو مشروع حکومتونه د مجهولو ډلو له لوري سقوط شي او امریکا او نورو لودیځو هېوادونو ته د مداخلې پلمه په لاس ورشي.
ولسمشر اردغان ټینګار کړی، چې د مالي او نورو افریقایي هېوادونو حالات له نږدې څاري او که اړتیا شي ترکیه به مداخله وکړي.
د ویلو ده، چې ولسمشر اردغان داسې مهال دا څرګندونې کوي، چې یوه اوونۍ وړاندې د مالي هېواد دوه ښارونه د حکومت ضد وسله والو لاس ته ولوېدل او د دفاع وزیر په ګډون یې څو لوړ پوړي چارواکي ووژل شول، دغه هېواد کې اوس واک پوځ ته سپارل شوی او د وسله والو ډلو د ځپلو په موخه پراخ او ځپونکي عملیات روان دي، چې روسیه یې هوایي ملاتړ کوي او داسې راپورونه هم ورکړل شوي، چې د ترکیې پرمختللې بې پیلوټه الوتکې هم عملیاتو کې برخه لري.
