وال سټریټ ژورنال: ​ایران د جګړې پای ته رسولو لپاره خبرو ته چمتوالی ښودلی

کابل ټکی کام (شنبه، ۱۲ غویی، ۱۴۰۵ل)
​د وال سټریټ ژورنال ورځپاڼې د راپور له مخې، ایران په خپل نوي وړاندیز کې د نرمښت او جوړجاړي نښې ښودلې دي، ترڅو له امریکا سره د جګړې پای ته رسولو لپاره خبرې اترې بېرته پیل شي.
​دې ورځپاڼې د هغو سرچینو له قوله چې له دې خبرو خبرې دي، راپور ورکړی چې ایران خپلې پخوانۍ سختې غوښتنې نرمې کړې دي. ایران ویلي که چیرې امریکا بریدونه ودروي او محاصره پای ته ورسوي، دوی چمتو دي چې د هرمز تنګي په څېر په مهمو موضوعاتو خبرې وکړي.
​ایران تر دې وړاندې ټینګار کاوه چې لومړی باید محاصره پای ته ورسیږي او بیا خبرې پیل شي.
​د متحده ایالاتو ولسمشر ډونالډ ټرمپ د ایران پخوانی وړاندیز رد کړی و.
​د وال سټریټ ژورنال په حواله، ایران په خپل نوي وړاندیز کې دا هم ویلي چې د بندیزونو د کمولو په بدل کې د اټومي مسایلو په اړه هم خبرو ته چمتو دی.
​تهران زیاته کړې چې که واشنګټن له دې وړاندیز څخه هرکلی وکړي، دوی چمتو دي چې راتلونکې اونۍ په پاکستان کې له امریکا سره خبرې پیل کړي.
​ډونالډ ټرمپ څو ساعته وړاندې وویل چې د ایران له نوي وړاندیز څخه خوښ نه دی، خو په دې اړه یې نور جزیات نه دي ورکړي.
​په ورته وخت کې، د ایران دولتي رسنۍ “ایرنا” راپور ورکړی،چې تهران د پنجشنبې په ماښام له امریکا سره د سولې د خبرو نو طرحه پاکستان ته سپارلې ده.
​همدارنګه د اکسیوس ویب پاڼې دا خبر تایید کړی او د دې آنلاین رسنۍ په وینا، د ایران متن د سولې د بهیر په اړه د امریکا له وروستیو تعدیلاتو وروسته چمتو شوی دی.