په حلب کې د ایران لوړپوړی پوځي قومندان وژل شوی
(کابل ټکی کام ۱۳۹۵ لیندۍ۲۴) زرغون خوږیاڼی
د ایران رسنیو ویلي، چې تیره ورځ د حلب په جګړه کې د ایراني پوځ قومندان حسن اکبري له یو شمیر نورو عسکرو سره یو ځای وژل شوی دی.
ایراني سرچینو ویلي، چې اکبري د حلب ښار په تدمر سیمه کې د یوه پوځي کنډک مشري کوله، چې تیره ورځ له وسله والو لخوا په یوه نښته کې ووژل شو.
ایرنا خبري اژانس په وینا، حسن اکبري سوریې ته د بي بي زینب د قبر ساتلو لپاره لیږل شوی و، چې تیره ورځ د حلب د ازادۍ په جګړه کې ووژل شو.
دوی د نورو عسکرو هویت نه دی په ډاګه کړی.
تیره ورځ د حلب ښار د درنو او سختو جګړو شاهد و، چې روسي او ایراني پوځيان د اسد ملیشو سره یو ځای د سني مسلمانانو پر وړاندې له سختې جګړې وروسته پر دغه ښار قبضه وکړه، چې د ملګرو ملتونو په وینا، وروسته یادې ملیشې او پوځونه د ملکي وګړو په کورونو ورننوتل او څوک یې چې لیدل د ښځو او ماشومان په ګدون یې ټول ووژل.
