(کابل ټکی کام ۱۳۹۵ لیندۍ ۲۴) زرغون خوږیاڼی
يوې امنيتي سرچينې کابل ټکی کام ته ويلي، چې د هلمند ولايت لښکرګاه اړوند د بولان په سيمه کې د ګډو ځواکونو او طالبانو تر منځ له تېرې ورځې راهيسې سخته جګړه روانه ده چې اوس هم دوام لري.
د سرچينې په وينا په دې جګړه کې دواړو لوريو ته تلفات اوښتي دي.
بل پلو د وسلوالو طالبانو له لوري کابل ټکی کام ته په يوه رالېږل شوي خبرپاڼه کې د يادې جګړې د تائيد تر څنګ ویل شوي، چې د دوی پلويانو په ګډو ځواکونو د ۶ ماينونو انفجارونه ترسره کړي دي.
خبرپاڼه زياتوي، چې جګړه يې د بولان د سپينې کوټې په سيمه کې ترسره کړې ده او ګډو قواوو ته يې درنه مرګ ژوبله اړولې ده.
عيني شاهدان وايي، چې دوی وليدل د جګړې ساحې ته د امبولانس چورلکې راغلې، مړي او زخميان يې انتقال کړل.
تر دې دمه چارواکو لا د دې جګړې په اړه څرګندونې نه دي کړي.
