جرمني پارلمان: په افغانستان کې زموږ د ځواکونو ماموریت ناکام دی
(کابل ټکی کام ۱۳۹۵ مرغومی ۸) زرغون خوږیاڼی
د جرمني د پارلمان یوه غړي ویلي، چې په افغانستان کې د جرمني ځواکونو ماموریت ناکام دی.
د جرمني د پارلمان غړي او د المان د وسله والو ځواکونو د کمیټې مشر هانس پیتر بارټلز وویل، چې په افغانستان کې د جرمني هیواد د پوځي ځواکونو ماموریت ناکام و او له یوې اوږدې جګړې او لویو خطرونو په منلو سره سره بیا هم په افغانستان کې امنیتٍي وضعیت مخ پر خرابیدو روان دی.
نوموړي له المان هیواده وغوښتل،چې په افغانستان کې د الماني پوځیانو په پاتې کیدو دې بیا له سره غور وکړي او په دې اړه دې د خپلو پوځیانو ماموریت وڅیړي.
بارټلز د تاګش شپیګل مجلې سره په مرکه کې ویلٍي، چې په افغانستان کې زموږ پوځي ماموریت هغومره مثبت نه و، لکه څرنګه چې یې موږ تمه کوله.
د بارټلز په وینا، په افغانستان کې امنیتي وضعیت مخ په خرابیدو روان دی او له اوږدې جګړې وروسته هم د افغانانو په ژوند کې مثبت بدلون نه دی راغلی او لا هم د افغانانو ژوند ته ګواښونه متوجه دي؛ خو سره له دې المان پرېکړه کړې چې خپل سرتیري په افغانستان کې کم کړي.
نږدې یوه اوونۍ وړاندې د المان دفاع وزیره لافون ديرلاين افغانستان ته په یوه ناڅاپي سفر راغله او دغلته په مزارشریف ښار کې د الماني ځواکونو پوځې اډې ته ورغله، چې د کريسمس يا د مسيحيانو د اختر د لمانځلو په خوشحالۍ کې د دوی سره ونډه واخلي.
