(کابل ټکی کام ۱۳۹۵ مرغومی ۱۹) الماس خدرخیل
تېره شپه د بلخ ولايت مرکز مزارشريف کې د نامعلومه وسلوالو له لوري د يوې کورنې درې غړي وژل شوي دي.
د بلخ ولایت د امنیه قومندانۍ د امنیت امرسمونوال عبدالرازق رسنيو ته ويلي، چې پیښه تیره شپه ناوخته د مزارشریف د نورخدا په کارته کې رامنځته شوې ده.
عبدالرازق زیاتوي، چې په ياده سيمه کې دوه وسلوال کسان یو کورته ننوتلي او د کورنۍ یوماشوم، یوه ښځه اویوځوان يې وژلي دي.
د هغه په وينا، تر پلټنې وروسته څرګنده شوه، چې بریدکونکو له دغې کورنۍ سره اړیکي لرلې اویاده پیښه دکورني تاوتریخوالي له کبله رامنځته شوې ده.
تردې د مخه هم د هېواد په بېلابېلو ولايتونو کې د نامعلومه وسلوالو له لوري په خپلو کورونو کې خلک وژل شوي، چې تر څېړنو وروسته پېښې د کورني تاوتريخوالي له امله ثبت شوي دي، د جنايي جرمونو د پېښو څېړونکي په دې اند دي، چې د ديموکراسۍ په راتلو سره په هېواد کې کورنۍ لانجې، شخړې او قتلونه زيات شوي.
