لوګر: د امنيتي ځواکونو په ډزو دوه تنه ملکيان وژل شوي
(کابل ټکی کام ۱۳۹۵ مرغومی ۳۰) الماس خدرخیل
د لوګر چارواکي وايي، چې د امنتيتي ځواکونو په ډزو سره دوه تنه ملکيان وژل شوي دي.
پېښه تېره ورځ د محمداغۍ ولسوالۍ کې رامنځته شوې ده.
د لوګر د والي وياند سليم صالح وايي، چې امنيتي ځواکونو د محکمې د حکم په اساس غوښتل چې هغه کورونه ونړوي چې په دولتي ۲۹۰۰ جريبه ځمکه کې جوړ شوي دي.
د هغه په وينا کله چې دولتي ځواکونو د کورونو په نړولو شروع وکړه نو د سيمې خلکو پر امنيتي ځواکونو ډزې وکړې، هغه زياته کړه، چې د امنيتي ځواکونو په متقابلو ډزو کې دوه تنه ملکي وګړي ووژل شول او يو بل ټپي شو.
که څه هم د ولایت چارواکي وایي، چې دې خلکو پر غضب شوې مځکه کورونه ودان کړي، خو د سیمې خلکو ویلي دي چې دوی عرفي اسناد او قوالې له ځان سره لري.
د يادونې ده، چې د هېواد په يو شمير ولايتونو کې زورواکو دولتي ځمکې غصب کړي، چې حکومت يې په بېرته اخيستلو کې پاتې راغلی.
