نامعلومه وسلوالو د کندوز د ابتدائيه محکمې رئيس تښتولی
(کابل ټکی کام ۱۳۹۵سلواغه ۲) الماس خدرخیل
چارواکي وايي، چې د کندوز د ابتدائيه پوځي محکمې رئيس اصل الدين د نامعلومه وسلوالو له لوري تښتول شوی دی.
د ۸۰۸ سپين زر زون وياند محفوظ اکبري ازادۍ راډيو ته ويلي، چې نوموړی له تخار ولايت څخه کندوز ته په لاره وو چې د کندوز ولايت خان اباد ولسوالۍ خواجه پسته په سيمه کې وتښتول شو.
هغه زياته کړه، چې د رئيس د تښتونې علت څرګند نه دی، خو د خوشې کولو لپاره يې عمليات پيل کړي دي.
د اکبري په وينا نوموړي پوليسو ته د خپل سفر په اړه معلومات نه وو ورکړي.
ويل کېږي د نوموړي سره يې د هغه يو ساتونکی هم تښتول شوی دی.
تر اوسه کوم چا د نوموړي د تښتونې مسئوليت نه دی منلی.
