د ترکيې پارلمان د ولسمشر اردوغان صلاحيتونه ډېر کړل
(کابل ټکی کام ۱۳۹۵ سلواغه ۳) الماس خدرخیل
د ورکړل شويو راپورونو پر بنسټ د ترکيې پالمان هغه لايحه تصويب کړه، چې له مخې به د دغه هېواد د ولسمشر رجب طيب اردوغان واکونه زيات کړل شي.
دغه اتلس ماده ييزه مسوده د پارلمان د پنځه سوه پنځوس غړو څخه يې ۳۳۹ کسانو تائيد کړې ده.
د نوې مسودې له مخې اردوغان صلاحيت لري، چې احکام صادر کړي او بیړنی حالت اعلان کړي.
اردوغان د پارلمان د منحل کولو تر څنګ وزيران او نور لوړپوړي دولتي چارواکي هم په خپل صلاحيت مقرورولی شي.
ياده مسوده به د روان کال په وروستیو کې په اساسي قانون کې د بدلون په اړه د یوې ټول پوښتني زمینه هم برابره کړي.
د ترکيې حکومتي چارواکي وايي چې د واکونو ډيرول به اداري کارونه لا اسانه او اغيزمن کړي.
په ترکيه کې تر ناکامې کودتا وروسته د ترکيې ولسمشر اردوغان په دې هڅه کې و، چې خپل قدرت او واک ډېر کړي، نوموړي غوښتل چې استخبارات او لوی درستيز هم تر خپل مستقيم کنترول لاندې راولي.
