د ګمبيا زوړ ولسمشر په دوه اونيو کې ۱۱ ميليونه ډالر غلا کړي
(کابل ټکی کام ۱۳۹۵سلواغه ۴) الماس خدرخېل
د ګمبيا چارواکي وايي، چې د دغه هېواد د پخواني ولسمشر یحی جامع له وتلو وروسته د دولت له خزانې ۱۱ ميليون ډالر ورک شوي دي.
د نوري ولسمشر اداما بارو سلاکار وايي، چې کارپوهان د ورکو شويو پيسو د دقيقې شميرې ارزونه کوي.
د بي بي سي د ورکړل شوي خبر پر بنسټ عیني شاهدانو ویلي، لوکس موټر او ځینې نور شیان یې لیدلي چې له هېواده د یحیی جامع د وتلو پر شپه د چاډ یوې باروړونکې الوتکې ته پورته کېدل.
د ګمبیا د نوي ولسمشر سلاکار فاتي خبريالانو ته وويل، هېواد یې له مالي کړکېچ سره مخامخ دی:(اوس د دولت خزانې تقریباً تشې دي. د مالیې وزارت، او د ګمبیا د مرکزي بانک کارپوهانو هم دا خبره تایید کړې ده).
د نوموړي په وينایواز تېرو دوو اونیو کې جامع له حکومتي خزانو تر ۱۱ میلیون ډېر ډالر غلا کړي.
د ګمبيا پخواني ولسمشر په دغه هېواد ۲۲ کاله واکمني وکړه او د شنبې په ورځ له ګمبیا ووت.
د نوي ولسمشر سلاکار وايي، ګمبيا کې يې د هوايي ډګر چارواکو ته لارښوونې کړي، چې د جامع اړوند هيڅ ډول څيزونو ته د وتلو اجازه ورنکړي.
تر اوسه نوی ولسمشر اداما بارو په ګاونډي سینیګال هېواد کې دی، خو خو ښکاره نه ده چې کله به خپل هېواد ته ستنېږي.
