د ننګرهار له محبس څخه ۳۲ زندانيان ازاد شول
(کابل ټکی کام ۱۳۹۶غوایی ۲۴) الماس خدرخېل
د ننګرهار ولايت چارواکي وايي، چې نن يکشنبه يې د ولسمشر د خاص فرمان له مخې د دغه ولايت له محبس څخه ۳۲ بنديان ازاد او خپلو کورنيو ته سپارلي دي.
د ننګرهار د والي وياند عطاءالله خوګياڼي رسنيو ته ويلي، چې دغه بنديان يې د ښځو د نړيوالې ورځې په مناسبت د خاص فرمان له مخې ازاد کړي دي.
د عطاءالله خوګياڼي په وينا له ياد محبس څخه خوشې شوي بنديان ټول جنايي دي.
په محبس کې يو تن سياسي بندي کابل ټکی کام ته وويل، چې د پخواني ولسمشر په وخت کې سياسي بنديانو ته هم تخفيف راتلو خو د ګډ حکومت په راتلو سره يې دغه چاره ځنډولې ده.
هغه وويل، چې ډيری سياسي بنديان د پوليسو او امنيتي ارګانونو له لوري په شک کې راوړل شوي او په وينا يې چې زياتو ته يې عدلي او قضايي ارګانونو له خوا له پنځو تر لسو کلونو د بند سزا ورکول شوې ده.
نوموړي غوښتنه وکړه چې د جنايي مجرمينو تر څنګ دې د دوی د بند په موده کې هم تخفيف راشي.
د يادونې ده، چې دا مهال د ننګرهار په محبس کې شاوخوا ۱۶ سوه زندانيان شپې سبا کوي، چې ډيری يې سياسي بنديان دي.
