د هلمند ولایت چارواکي وايي له تیرې شپې راهیسې د بهرنیو ځواکونو په مشرۍ د ناوې ولسوالۍ د بېرته نیولو عملیات پیل شوي دي.
د دولتي سرچینو په خبره، د ناوې ولسوالۍ د بېرته نیولو عملیات تېره شپه د بهرنیو ځواکونو په مرسته له ۳ استقامتونو پیل شول. چارواکي وايي عملیات د امریکايي ځواکونو د چورلکو په ډزو سره پیل شول.
چارواکو رسنیو ته ویلي، په هوايي بریدونه کې یې ۴۲ طالبان وژلي او ۲۷ نور ټپیان شوي دي.
د هلمند د امنیه قومندانۍ ویاند، عبدالسلام افغان ویلي، د دې عملیاتو موخه د هغوګواښونه له منځه وړل دي چې د ولایت مرکز لښکرګاه ورسره مخ ده. ځکه د ناوې ولسوالۍ لښکرګاه ښار ته نږدې پرته ده.
چارواکي له طالبانو د ځېنو سیمو د بېرته نیولو خبر ورکوي خو طالبان وايي چې د ولسوالۍ د بېرته نیولو عملیات ناکام شوي دي.
د طالبانو ویاند ذبیح الله مجاهد وايي، ”لومړي سر کې د دښمن کمانډويي عسکر د ناوې ولسوالۍ اړوند د عینک ته نیږدې د امیر سالم آغا د زیارت سره له هوا څخه کښته کړل شول“. نوموړی زیاتوي ”کله چې کمانډو عسکر په یاده سیمه کې راکښته کېدل، د مجاهدینو لخوا ورته پخوانۍ آمادګۍ نیول شوې وه، چې له هرې خوا له کلکو ګوزارونو کارنده بریدونو سره مخ شول“.
مجاهد زیاتوي ”کله چې دښمن درانه تلفات ولیدل نو یې سېک له لاسه ورکړ، اوس د بېرته وتلو او تېښتې لار لټوي“.
طالبان وايي چې په عملیاتو کې یې ۹ کمانډو عسکر وژلي او ګڼ شمېر ټپیان شوي. ”په متقابلو ډزو کې ۲ تنه مجاهدین هم شهیدان او ۳ تنه ټپيان شوي دي“.
ذبیح الله مجاهد وايي افغان او بهرني ځواکونه غواړي د هلمند ولایت په نادعلي او ځېنو نورو محاصره ولسوالیو کې له ماتې وروسته، د دوهم ځل لپاره په ناوه کې خپل بخت وازمويي، چې په خبره یې ”په لومړۍ وهله کې له تلفاتو او ماتې سره مخ شول“.
د ناوې ولسوالۍ کنټرول له یوه کال راهیسې له طالبانو سره دی.
