افغانستان او پاکستان ډيورنډ کرښې دواړو غاړو ته ګډ عمليات کوي
(کابل ټکی کام ۱۳۹۶چنګاښ ۱۴)
افغان ولسمشر اشرف غني له امريکايي پلاوي سره د افغانستان او پاکستان تر منځ پر ډيورنډ کرښه د ګډو عملياتو وړانديز ومانه.
د سناتور جان مککين په مشرۍ امريکايي پلاوي له پاکستان سره په دې اړه له خبرو وروسته له اشرف غني سره هم غږيدلی او دواړو خواو په کرښه کې د ګډو پوځي عملياتو پريکړه کړې ده.
د ولسمشر وياند نجیب ازاد وايي، چې امريکايي پلاوي ولسمشر غني ته وويل، چې د پاکستان لوی درستيز جنرال قمر باجوه پر ډيورنډ کرښه د وسله والو پر ضد د ګډو پوځي عملياتو توافق کړی دی.
د جان مککين په وينا امریکا به د يادو عملياتو د تائيد او څارنې زمينه برابره کړي.
نجیب ازاد وايي، دا داسې ګډ عمليات دي، (که پاکستان د کرښې دې غاړې د ترهګرو په اړه معلومات لري موږ سره به يې شريکوي او که موږ په پاکستان کې د وسله والو د ځای او مرکزونو په اړه معلومات لرو نو هغوی ته به يې په واک کې ورکوو، دواړه هېوادونه مکلف دي چې د نړيوالو تر څارنې لاندې د وسله والو په وړاندې عمليات وکړي).
خو د ښاغلي ازاد په وینا پاکستاني لوری د یو درېیمګړي تر څارنې لاندې د ترهګرو خلاف عملیاتو ته نه وو چمتو او زياته يې کړه چې “زموږ یواځينۍ هڅه همدا وه چې پر پاکستان فشار راشي څو د یو درېیمګړي تر څارنې لاندې دې ته چمتو شي چې د ترهګرو پر ضد به جنګیږي. دا هماغه څه دي چې موږ یې په لټه کې یوو”
جان مککين تېره ورځ په کابل کې د يو شمير چارواکو سره له ليدنو کتنو وروسته وويل، چې امريکا په افغانستان کې د بريا ادعا نه کوي او د جګړې ګټلو لپاره يې لا هم ډیر مزل په مخ کې پاتې دی.
نوموړي د افغانستان د اوسني وضعيت په اړه اندېښنه څرګنده کړه او زياته يې کړه، چې د امريکا زړه تګلاره مناسبه نه وه ځکه د زرګونو بهرنيو او افغان عسکرو په وژل کېدو هم بريا ترلاسه نه شوه، نوې تګلاره بايد دغه حالت ته تغير ورکړي.
په ورته وخت کې افغان شنونکی او د کابل پوهنتون استاد فيض ځلاند د دغو ګډو عملياتو په اړه ليکي “د افغانستان په معاصر کې تر ټولو ستر خیانت همدا کیدی شي” نوموړي ويلي که د افغانستان د خاوري اصلي بچیان ددې شومې دسیسې خلاف غږ پورته نه کړي، کیدی شي موږ د تاریخ داسې پړاو ته ټیل وهلی شو چې د سوريي او عراق ولسونه به را پورې وخاندي.
-الماس خدرخېل-
