دوبۍ : په لوړپوړیزه ودانۍ کې اورلګیدنه رامنځته شوې
(کابل ټکی کام ۱۳۹۶زمری ۱۳ فرید افغان)
راپورونه وایي چې نن سهار د دوبۍ ښار په ۸۶ پوړیزه ودانۍ کې سخته اورلګیدنه رامنځته شوې ده
عینی شاهدانو رسنیو ته ویلي چې اور لګیدنه په ۶۷ م پوړ کې د شپې د یوې بجې په شاوخوا کې پيل شوه.
خو د دوبۍ پولیسو بیا ګولف نیوز ته ویلي دي چې اورلګیدنه په نهم پوړ کې رامنځته شوه او په چټکه توګه نورو پوړونو ته وغځیده.
د دوبۍ د اور وژنې ادارې ویلي دي چې ودانۍ په ډیرې چټکتیا سره تخلیه شوې او د اور لګیدنې د قابو کولو چارې دوام لري.
یو تن عیني شاهد رسنیو ته ویلي چې « مونږ ویده وه چې په ناڅاپي ډول سره د اورلګیدنې د خطر زنګ د غږیدو سره له خوبه ویښ شو. مونږ په ۵۰ م پوړ کې وو. خلک ډیر زیات وارخطا ول. په زینو کې ډیر زیات رش وو. په لسو دقیقو کې د ودانۍ نه په وتو قادر شو. »
د یادونې وړ ده چې په پیښه کې چاته ځاني زیان ندی رسیدلی.
د دوبۍ د اور وژنې مشر ویلي دي چې اورلګیدنه په ټولیز ډول تر کنترول لاندې راغلې ده .
چارواکو ویلي چې نه پوهیږي اورلګیدنه د څه له کبله رامنځته شوې خو په وینا یې څیړنې یې پیل کړې دي .
د یادونې وړ ده چې په ۲۰۱۵ کال کې هم په یاده آسمان څکې ودانۍ کې اورلګیدنه رامنځته شوې وه.
