(کابل ټکی کام ۱۳۹۶زمری ۲۴): شاوخوا یوه اوونۍ وړاندې راپورونه ورکول شول، چې ګنې وسله والو طالبانو او داعش ډلې په شریکه په ميرزاولنګ سيمه کې عمليات کړي او ګڼو ملکي کسانو ته يې مرګ ژوبله اړولې ده.
خو وسله والو طالبانو همغه وخت د ملکي وګړو مرګ ژوبله او هلته له داعش سره د ګډو عملياتو راپورونه رد کړل او دا يې د دولتي چارواکو او سيمه ييزو مسولينو د دوی پرضد تبليغات وبلل.
د طالبانو وياند قاري يوسف احمدي رسنيو ته په لېږلې خبرپاڼه کې ويلي و، چې طالبان د ميرزاولنګ په سيمه کې ولسي خلکو ته هر ډول مرګ ژوبله په کلکه ردوي، هلته يې هېڅ عام سړي، ښځې، ماشوم او سپين ږيري ته زيان نه دی اړولی او زياته کړې يې وه، (چې نه يواځې په ميرزاولنګ کې شيعه ګان د دوی تر تسلط لاندې سيمو کې ژوند کوي، بلکې په نورو سيمو کې هم شيعه قومونه د طالبانو تر حاکميت لاندې خپل ارام ژوند لري او هيڅ ستونزه ورته نه ده پېښه شوې) .
اوس چې له يادې پېښې لس ورځې تېرېږي د اعماق خبري اژانس په نوم خبري پاڼه چې د داعش ډلې خبرونه نشروي او په افغانستان کې د يو شمير بريدونو پړه په غاړه اخلي، د دغه پېښې مسئوليت هم منلی دی.
داعش ډلې ويلي، چې د دوی وسله والو د سرپل ولايت په ميرزاولنګ سیمه کې په هغه کلي بريد کړی، چې ټول وګړي يې شيعه ګان دي، چې په ترڅ کې يې ۵۴ تنه وژلي دي.
که څه هم د ميرزاولنګ سيمې د نيولو مسئوليت وسله والو طالبانو په غاړه اخيستی و او ويلي و، چې په سيمه کې يې د محلي پوليسو يو شمير پوستې نيولي او لسګونه تنو اربکيانو ته چې مشري يې د غضنفر قومندان په غاړه وه مرګ ژوبله اړولې ده.
خو ویل کېږي چې په ياده سيمه کې د داعش وسله وال هم فعاليت کوي او وخت ناوخت پر شيعه ميشتو عامو وګړو بريدونه کوي.
شاوخوا درې ورځې مخکې په افغانستان کې د ملګرو ملتونو مرستندوی ماموریت (یوناما) وويل چې په مرزاولنګ کې یې د ملکي کسانو د وژل کېدو پېښې څېړلو لپاره سيمې ته پلاوی لېږلی دی، خو تر اوسه طالبانو د دغه پلاوي په اړه څه نه دي ويلي او نه هم ياد پلاوي د څېړنو پايلې رسنيو سره شريکې کړي.
دا په داسې حال کې ده، چې درې ورځې وړاندې طالبانو رسنیو او هغو ادارو ته بلنه ورکړه، چې غواړي د پېښې په اړه څېړنه وکړي او حقايق خپاره کړي، چې سيمې ته ورشي او هغه څه روښانه کړي، چې څه پېښ شوي دي.
