چاه اب ولسوالۍبازار کې دوه سرايونه- سل هټۍ سوځېدلي
(کابل ټکی کام ۱۳۹۶وږی ۷): د تخار ولايت د چاه اب ولسوالۍ په بازار کې ستره اورلګېدنه رامنځته شوې، چې خلکو ته يې درانه مالي زيانونه اړولي دي.
ځايي چارواکي وايي، چې په دغه بازار کې اورلګېدنه د لرګيو د يو دکان څخه نورو سرايونو او هټيو ته خپره شوې، چې په ترڅ کې يې دوه سرايونه او تر سلو پورې دکانونه په مکمله توګه سوځېدلي دي.
دغه اورلګېدنه تېره شپه د ۸ بجو په شاوخوا کې رامنځته شوه چې ټوله شپه يې دوام وکړ او نن سهار د خلکو او پوليسو په مرسته اور مړ شو.
ځايي اوسېدونکي وايي، چې د شپې ناوخته ورته د اوروژنې ډله رسېدلې چې تر پنځو بجو پورې يې ټول اور مړ کړ.
چارواکي وايي، چې په دغه اورلګېدنه کې چاته ځاني زيان نه اوښتی خو زياتوي چې د خلکو د دکانونو د سوځېدو له کبله خلکو ته تر سلو ميلونو افغانيو زيات تاوان رسېدلی دی.
تر اوسه پورې د اورلګېدنې لامل نه دی په ډاګه شوی خو په اړه يې پلټنې روانې دي.
