د بشري حقونو کمېسیون: په هوايي بریدونو کې د افغانانو مرگژوبله درې برابره شوې
(کابل ټکی کام ۱۳۹۶ تله ۲۶) د افغانستان د بشري حقونو خپلواک کمېسیون وايي، د ټرمپ د نوې ستراتېژۍ له اعلان سره سم، په هوايي بریدونو کې د ملکي وگړو مرگژوبله درې برابره شوې ده.
د بشري حقونو د خپلواک کمېسیون ویاند بلال صدیقي وايي، امریکا په تېره میاشت کې د تېرو اوو کلونو په پرتله ډېره بمباري کړې ده، چې زیات تلفات یې ملکي وگړو ته اړولي دي.
د صدیقي په خبره، د روان کال په لومړیو شپږو میاشتو کې ۲۶۲ ملکي وگړو ته مرگژوبله اوښتې، چې ۱۶۹ تنه یې وژل شوي او ۹۳ تنه نور ټپیان شوي دي.
د بشري حقونو کمېسیون وايي، ۱۷۲ تنه ملکي وگړي افغان هوايي ځواکونو وژلي او ۸۲ تنه د چټک غبرگون ځواکونو له لوري وژل شوي دي.
د بشري حقونو کمېسیون د امریکا او افغان دولت څخه وغوښتل، چې په هوايي بریدونو کې د ملکي وگړو مرگژوبلې ته پام وکړي.
امریکا په تېره سپټمبر میاشت کې د هېواد په بېلابېلو ولایتونو کې ۷۵۱ بمونه غورځولي، چې ډېری ملکي وگړو ته پکې مرگژوبله اوښتې ده.
د ملگرو ملتونو په تازه راپور کې هم راغلي، چې د روان کال په تېرو نهو میاشتو کې ۲۶۴۰ ملکي وگړي وژل شوي، چې دغه شمېره د تېرو کلونو په پرتله ډېره لوړه ده.
