پاکستان: چاودنه کې ۱۷ پوليسو ته مرګ ژوبله اوښتې
(کابل ټکی کام ۱۳۹۶تله ۲۶): د پاکستان په کويټه ښار کې د پوليسو په موټر چاودنه شوې، چې له کبله يې ۱۷ پوليسو ته مرګ ژوبله اوښتې ده.
پاکستانيو رسنيو ويلي، چې په چاودېدونکو توکو بار يوه موټر د پوليسو د انتقالوونکي لوی موټر تر څنګ چاودنه کړې، چې په ترڅ کې يې ۷ پوليس وژل شوي او لس تنه نور ټپيان دي.
چاودنه د کوټې ښار په سرياب روډ کې د پوليسو د يوې پوستې تر څنګ رامنځته شوې ده.
امنيتي سرچينې وايي، د پوليسو په انتقالوونکي موټر کې شاوخوا څلوېښت کسان سپاره و، چې چاودنه پرې وشوه.
د پېښې ځای ته امنيتي ځواکونه رسېدلي او د پلټنې عمليات يې پيل کړي دي.
په دغه چاودنه کې ټپيان جناح روغتون ته د تداوۍ په موخه وړل شوي دي، چې د ځينو روغتيايي حالت د اندېښنې وړ ښودل شوی دی، ښايي په پېښه کې د وژل شويو کسانو شمېره لوړه شي.
تر اوسه د دغه برید مسئوليت کومې ډلې په غاړه نه دی اخيستی.
خو تر دې مخکې په پاکستاني ځواکونو د ځينو بريدونو پړې د تحريک طالبان پاکستان او داعش ډلو منلې دي.
