(کابل ټکی کام ۱۳۹۶ لړم ۱۶ فرید افغان)
نن سهار شاوخوا ۱۰ بجې او ۴۵ دقیقې د شمشاد تلویزیون پر ودانۍ تعرضي حمله وشوه چې په څو ساعتیزه نښته کې یې یو شمیر کارکونکو ته یې مرګ ژوبله واوښته
د کابل پولیس وایي چې؛ بریدګر ټول ۳ تنه و چې په سپکو او درنو وسلو سنبال و، لمړی یې د تلویزون په ساتونکو برید پیل کړ، چې وروسته بیا وتوانیدل د تلویزون ودانۍ ته داخل شي .
نښتې ټولټال ۳ ساعته دوام وکړ چې په ترڅ کې یې د یوې میرمنې په ګډون ۲ تنه وژل شوي او ۲۰ نور ټپیان دي.
له نښتې څخه څو شیبې وروسته طالب ویاند ذبیح الله مجاهد په یوه پیغام کې په یاده حمله کې لاس لرل رد کړل.
له تلویزیون څخه د شمشاد یوه روغ وتلي کارکوونکي ویلي چې د برید پر مهال په ودانۍ کې شاوخوا ۱۰۰ تنه کارکوونکي پاتې و.
د شمشاد تلویزیون د سیاسي خپرونو مسوول میرویس ستانکزي بي بي سي ته ویلي چې دجګړې پر مهال د تلویزیون کارکوونکي له خوندي لارې له ودانۍ وتلي دي.
داعش ډلې د دې برید مسؤلیت منلی او ویلي یې دي چې په دې برید کې یې ۲۰ تنه پولیس او د شمشاد کارکوونکي وژلي دي.
پر طلوع تلویزون له برید وروسته دا دوهم تر ټولو لوی برید ده چې په رسنیو ترسره کیږي.
د یادونې وړ ده چې شمشاد تلویزون په هیواد او بهر کې ډیر کتونکي او مینوال لري خو په ځینو سریالونو یې یو شمیر خلک نیوکه کوي چې ګواکې له افغاني او اسلامي دود سره سمون نه خوري.
دا چې داعش ډلې ولې د شمشاد تلویزیون د خپل برید هدف وګرځاو لا تر اوسه معلومه نده.
دې ډلې په تیر کې هم د کابل پر یو شمیر مساجدو خونړۍ حملې ترسره کړې چې لسګونو افغانانو ته یې د سر دروند زیان واړاو.
شمشاد تلویزیون له برید وروسته په سمدستي توګه خپلې خپرونې بیرته پیل کړې
پر شمشاد تلویزیون برید افغان ولسمشر اشرف غني، پخواني جمهور رئیس حامد کرزي، د بلخ والي،یوناما او ګڼو لوریو غندلی او دا یې د بیان پر آزادۍ برید بللی دی
