له عطانور وروسته حکومت بسم الله خان او تاج محمد جاهد ته هم د فساد دوسيې جوړې کړې

(کابل ټکی کام ۱۳۹۶ مرغومی۵ فرید افغان)

ویساورځپاڼې د خپلو سرچینو په استناد خبر ورکړی چې دملي یووالي حکومت د دفاع پخواني وزیر بسم الله خان محمدي او د کورنیو چارو پخواني وزیر تاج محمد جاهد ته د فساد دوسیې جوړې کړې دي.
ورځپاڼه وایي چې باوري سرچینو یې ورته ویلي چې د دې دوسیې مخپاڼه هغه مهال راڅرګنده شوه کله چې بسم الله خان د داکتر عبدالله په کور کې د عطانور ننګه وکړه او هغه یې په حقه وباله.
سرچینې ویلي چې غونډه داکتر عبدالله د دې په خاطر وربللې وه تر څو هغه جمعیتیان چې د عطانور په څنګ کې د عبدالله پرضد ولاړ دي، بیل او وپیژني.
عبدالله بسم الله خان ته ویلي چې، ته باید د عطانور د ملاتړ پر ځای د خپل فساد د دوسیو غم وخورې.
پر جاهد او محمدي تور و چې د ندو پرمهال یې پراخې مالي درغلۍ کړې دي.
د یادونې وړ ده چې جمعیت ګوند له پخوا ویشل شوی و خو تیره ورځ د رسنیو په مخکې یې داسې دوه زاویې تشکیل کړې چې د صالح، ادیب فهیم او عبدالله ډله یو پلو او د اسماعیل خان، رباني او عطانور ډله بلې خواته پاتې شوې.
د بسم الله خان او جاهد د دوسیو خبر داسې مهال رسنیزه کیږي چې د ‹‹خبرنامه افغانستان›› په نامه یوې نشریې ویلي چې؛ د عبد الله او عطانور تر منځ کړکیچ هغه مهال زیات شو کله چې په حیرتان بندر کې عطانور د عبدالله د شریک او د ولسي جرګې د وکیل حاجي میرزا رحمان د هغو اکمالاتو مخه ونیوله چې په افغانستان کې میشتو ناټو ځواکونو ته یې لیږدول.
عبدالله د عطا پر ضد دوسیه جوړه کړه او د امریکا او اروپایي هیوادونو سفارتونو ته یې د ملاتړ په موخه واستوله هغوی دوسیه لاسلیک کړې او تر هغه وروسته د یو ګواښونکي لیک په څیر بلخ ته لیږل شوې ده.
خبرنامه زیاتوي؛ عبدالله ځکه دا کار ترسره کړی چې د ناټو ځواکونو ته د تیلو او روغنیاتو قراداد یې له لاسه ونه وځي او د جنرال داوود ټاکل بلخ ته هم په همدې موخه ترسره شوي ترڅو یې له یوې خوا د اکمالاتو په رسولو کې کوم مانع شتون ونه لري او له بل پلوه دحیرتان بندر څخه ترلاسه کیدونکې پیسې ځانته ووهي.