(کابل ټکی کام ۱۳۹۶ مرغومی ۱۲ فرید افغان)
د غزني چارواکي وایي؛ په دې ولایت کې ۶ تنه ملي او محلي پولیس او دوه تنه نور سیمیز غله چې په جنایي پیښو کې ککړ و د قانون منګولو ته سپارل شوي.
د غزني د والي ویاند رسنیو ته ویلي؛ نیول شوي پولیس د لارې شکولو، غلا او قتل په څو قضیو ښکیل و چې تیره ورځ په قرباغ ولسوالۍ کې ونیول شول.
د ویاند په خبره؛ نیول شوو ۸ تنو د غزني د قرباغ ولسوالۍ په مربوطاتو او د کابل کندهار پر لاره غلا او شوکې کولې او په وینا یې چې ۴ ورځې وړاندې یې دسیمې یو کس هم وژلی و،چې د سیمې دخلکو له بار بار غوښتنو وروسته امنیتي ځواکونو یې د نیولو اقدام وکړ.
دنیول شویو پولیسو څخه ۲ غلا شوي موټر، دوه میله وسله هم نیول شوې ده.
دا لومړی ځل نه دی چې امنیتي ځواکونه په رڼا ورځ له دولتي یونیفورم څخه په استفادې جنایي پیښې سرته رسوي،بلکې تر وړاندې هم په همدې ولایت او دهیواد په مختلفو سیمو کې د امنیتي ځواکونو پر وړاندې داډول جنایي پیښې ثبت شوې دي.
دیادونې وړ ده چې څو ورځې وړاندې په خوست ولایت کې هم یو شمیر خلکو رسنیو ته ویلي و، چې په دې ولایت کې ډیری امنیتي ځواکونه له اختطاف چیانو او غلو سره لاس لري او د هغوی په توسط هرڅه ترسره کوي.
خلک وایي امنیتي چارواکي له غلو او نورو جنایي مجرمینو سره لاس لري او که ونیول شي هم بیرته ژر خلاصیږي.
