د ټرمپ یوه ټویټ په پراخه کچه غبرګونونه راوپارول
(کابل ټکی کام ۱۳۹۶ مرغومی ۱۲ فرید افغان)
تیره ورځ امریکایي ولسمشر ټرامپ دنوي کال په لومړۍ ورځ پرخپله ټویټرپاڼه ولیکل ‹‹په تیرو ۱۵ کلونو کې امریکا په احمقانه ډول پاکستان ته تر ۳۳ میلیارد ډالرو ډیرې مرستې کړي، او دوې (پاکستان) موږ ته پرته له دروغو او خطاایستلو بل څه ندي راکړي او زموږ پر مشرانو یې د احمقانو خیال کړی.››
ټرمپ ویلي، پاکستان د وسلوالو ډلو مرسته کړې او په وینا یې چې نور به داسې نه ترسره کیږي.
د ټرمپ دې خبرو په پاکستان او ا فغانستان کې پراخ غبرګونونه راپارولي.
د پاکستان د بهرنیو چارو وزیر خواجه آصف ویلي؛ امریکا غواړي خپله ماتې په پاکستان تاوان کړي.
نوموړي له امریکا سره د خپل هیواد دښیګڼو یادونه کړې چې په خبره یې پاکستان امریکا ته خپل بندرونه خلاص کړل، د هغوی د کاروانونو ساتنې تر څنګ یې نوره مرسته هم له امریکا سره کړې ده.
نوموړي همداراز له امریکا غوښتي چې په افغانستان کې دې د۱۵ کلنې جګړې حساب ورکړي، دوی د ټولو ورکړو پیسو حساب ورکولو ته اماده دي .
د پاکستان د جماعت اسلامي مشر سراج الحق په یوه ټویټ کې د پاکستان دخپلواکي خبره کړې او ویلي یې دي چې دڅو دالرو په بدل کې به خپل عزت خرڅ نه کړي .
همداراز پاکستانۍ رسنۍ خبر ورکوي چې د دې هیواد لومړي وزیر شاهد خاقان عباسي دټرمپ دخبرو په تړاو د وزیرانو شورا بیړنۍ غونډه ورغوښتې ده.
ایکسپریس ټریبیون لیکي؛ چې پاکستان د ټرمپ دخبرو په غبرګون کې د امریکا سفیر ډیویډ هیل احضار کړی او خپل رسمي اعتراض یې ورکړی دی.
خو په افغانستان کې بیا د ټرمپ دخبرو هرکلی شوی.
که څه هم ارګ په رسمي توګه تر اوسه په دې تړاو څه نه دي ویلي خو یو شمیر سیاسي څیرو یې په اړه غبرګونونه ښودلي.
پخواني ولسمشر حامد کرزي ویلي چې موږ پخوا دا دریځ درلوده خو امریکایان اوس پرځان پوه شول.
نوموړي غوښتي چې امریکا دې د پاکستان پرضد دریځ لاپیاوړی کړي.
د روند سبز ګوند مشر امرالله صالح بیا ویلي چې دا دافغانانو غوښتنه ده چې د پاکستان پر وړاندې جدي اقدامات ترسره کړي.
