کابل: د پنځمې امنيتي حوزې اړوند سيمه کې چاودنه شوې
(کابل ټکی کام، ۱۳۹۶، مرغومی ۱۲) څو شېبې وړاندې د کابل ښار د پنځمې امنيتي حوزې په مربوطاتو کې د چاودنې غږ واورېدل شو.
د خامه پريس د راپور سره سم په چاودنه کې تلفات اوښتي، خو د دقيقو شمېرو په اړه معلومات نه دي ورکول شوي.
د کابل يوې امنيتي سرچينې کابل ټکی کام ته وويل: چاودنه د پنځمې ناحيې اړوند د پغمان ولسوالۍ په مربوطاتو کې د پوليسو په يو رينجر موټر ترسره شوې ده.
د کورنيو چارو وزارت رسنيو ته ويلي، چاودنه د يادې ولسوالۍ په باغ داوود سيمه کې شوې، په ترڅ کې يې درې پوليس ټپيان شوي دي.
وخت ناوخت طالبان د خپلو چيريکانو په واسطه په کابل او شاوخوا سيمو کې د دولت په نظامي چارواکو او دولتي پوليسو، عسکرو دغه ډول چاودنې او بريدونه کوي، خو تر دې دمه يې په دې اړه څه نه دي ويلي.
