(کابل ټکی کام، ۱۳۹۶، مرغومی ۲۱) تېره شپه د ننګرهار ولايت د خوږياڼو ولسوالۍ مربوط د سورډاګ سيمه کې ګډو ځواکونو له داعش او حکومت سره د طالبانو په لومړۍ کرښه شپني عمليات کړي، چې پر مهال يې د ملکي خلکو په ګډون ۲۷ تنه عسکر او طالبان وژل شوي دي.
يوې سيمه ييزې باوري سرچينې کابل ټکی کام ته وويل، د پنج شنبې په شپه افغان او امريکايي ځواکونو د سورډاګ په سیمه کې د طالبانو په لومړۍ کرښه عملیات پيل کړل، چې پر مهال يې د دواړو لوريو تر منځ نښته رامنځته شوه او وروسته په سيمه کې بمبارۍ وشوې، چې په ترڅ کې يې ملکي خلکو، طالبانو او دولتي ځواکونو ته مرګ ژوبله رسېدلې ده.
د سرچينې په وينا، په بمبارۍ کې د مالي زيان سربېره شپږ تنه ملکيان وژل شوي او يو شمېر نور ټپيان دي.
طالبانو دغه نښتې تاييد کړي او وياند يې ذبيح الله مجاهد کابل ټکی کام ته په رالېږلې خبرپاڼه کې ويلي، د نښتې پر مهال ديارلس سپيشل فورس عسکر وژل شوي او ګڼ شمېر نور ټپيان دي.
ښاغلی مجاهد وايي، د ګډو ځواکونو عمليات د طالبانو له سخت غبرګون سره مخ شول، چې پر مهال يې په سيمه کې په يو مسجد، کلي او کورونو بمبارۍ وکړې، په ترڅ کې د ښځو او ماشومانو په ګډون څوارلس تنه ملکيانو ته مرګ هم مرګ ژوبله واوښته.
خبرپاڼه کې راغلي، د جګړې پر مهال اته طالبان وژل شوي او څلور نور ټپيان دي.
طالب وياند ذبيح الله مجاهد وايي: (اشغالګر دښمن چې کله په کوم ځای کې د مجاهدینو له مقامت سره مخ شي او تلفات وویني نو کسات له ولسي خلکو اخلي او کلي او کورونه له یوې مخې بمبارکوي.)
د سور ډاګ کلي يو تن اوسېدونکي عابدالله کابل ټکی کام ته وويل، په سيمه کې د طالبانو دغه لومړۍ کرښه د ولسي خلکو په ملاتړ د داعش ډلې د مخنيوي په موخه جوړه شوې وه، خو په وينا يې د ګډو ځواکونو له لوري پرې بمبارۍ او عمليات وشول، څو سيمې ته د داعش په راتللو لاره هواره شي.
طالبانو له تېرو څو مياشتو راهيسې په خوږياڼو ولسوالۍ کې د داعش ډلې سره په ځلونو جګړې وکړې او د هغوی د مخکې تګ مخه يې ډپ کړه.
دا لومړی ځل نه دی، چې په ننګرهار کې د داعش ضد لومړۍ کرښې د ګډو ځواکونو د شپنيو عملياتو او هوايي بريدونو هدف ګرځي، بلکې تر دې مخکې هم د امريکا هوايي ځواک يواځې د داعش پر خلاف د طالبانو لومړۍ کرښې په نښه کړي او بمبار کړي دي.
په داسې حال کې دغه عمليات ترسره کېږي، چې څه موده مخکې په ولسي جرګه کې د ننګرهار د خلکو استازي ظاهر قدير او پخواني ولسمشر حامد کرزي ويلي و چې د ملي امنيت شورا، امنيتي ادارې او امريکايان له داعش سره مرسته کوي او هغوی ته د مخکې تګ لارې چارې برابروي.
